ព្រះសីហនុ៖ មជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មសមុទ្រ សហការជាមួយមន្ទីរកសិកម្ម រុក្ខាប្រមាញ់ និងនេសាទ និងខណ្ឌរដ្ឋបាលជលផលខេត្តព្រះសីហនុ រៀបចំពិធីលែងកូនក្តាមសេះចំនួន ៥០ម៉ឺនកូនចូលក្នុងតំបន់ដែននេសាទសហគមន៍ទំនប់រលក ឃុំទំនប់រលក ស្រុកស្ទឹងហាវ ខេត្តព្រះសីហនុ។

ពិធីនេះធ្វើឡើងក្រោមអធិបតីភាព អនុរដ្ឋលេខាធិការក្រសួងកសិកម្ម លោក ឡោ រស្មី និងលោកស្រី ហ៊ូ សុពណ៌ តំណាងរដ្ឋលេខាធិការក្រសួងកសិកម្ម លោក គង់ ច័ន្ទវាសនា នាព្រឹកថ្ងៃទី០២ ខែកុម្ភៈ ឆ្នាំ២០២៤។

ពិធីលែងកូនក្តាមសេះនេះ រៀបចំឡើងក្នុងគោលបំណងដើម្បីចូលរួមអភិរក្ស និងបង្កើនផល ស្តុកក្ដាមសេះក្នុងជម្រកធម្មជាតិ។ ចំពោះក្តាមសេះញីដែលមានពងខាងក្រៅ ត្រូវបានយកមកថែរក្សា និងភ្ញាស់រួចបំប៉នឲ្យក្លាយជាកូនក្តាមសេះនៅមជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មសមុទ្រ នៃរដ្ឋបាលជលផល។

ក្តាមសេះ ជាធនធានជលផលដ៏មានសារសំខាន់សម្រាប់អ្នកនេសាទតំបន់ឆ្នេរ ជាពិសេសក្តាមសេះក្នុងខេត្តកែបមានឱជារសឆ្ងាញ់។ តំបន់កោះពោធិ៍ ខេត្តកែប ជាទីតាំងដ៏សំខាន់មួយដែលប្រភេទក្តាមសេះនេះ តែងតែមកពងកូនក្នុងចន្លោះពីខែឧសភា ដល់ខែកក្កដា ជារៀងរាល់ឆ្នាំ ដោយសារទីតាំងនេះ មានស្មៅសមុទ្រដ៏ស្តុកស្តម្ភ។ ក្រសួងកសិកម្ម រុក្ខាប្រមាញ់ និងនេសាទ បានប្រកាសដាក់តំបន់កោះពោធិ៍ ជាដែនជម្រកសុវត្ថិភាពជលផលក្តាមសេះ ដោយហាមឃាត់ការធ្វើនេសាទក្តាមសេះក្នុងតំបន់នេះចាប់ពីខែឧសភា ដល់ខែកក្កដាជារៀងរាល់ឆ្នាំ៕