បារាំង៖ យោងតាមសារព័ត៌មានកីឡាបារាំងដ៏ល្បីល្បាញមួយបានរាយការណ៍ថា កីឡាករចំណូលថ្មីរបស់ Paris Saint-Germain, Lionel Messi នៅតែបន្តអវត្តមានក្នុងការប្រកួតក្របខណ្ឌកំពូលបារាំង Ligue1 នាចុងសប្តាហ៍នេះ ដែលក្រុមជើងឯករងលីគបារាំងមួយនេះ នឹងត្រូវបន្តការប្រកួតសប្តាហ៍ទី ៣ ទល់នឹងក្រុម Brest។

ទន្ទឹមនឹងនេះ ប្រភពដដែលបានបន្តថា អតីតមិត្តរួមក្រុមរបស់ Messi នៅ Barcelona, Neymar Jr ក៏មិនត្រូវបានដាក់ក្នុងបញ្ជីឈ្មោះកីឡាករសប្តាហ៍នេះដែរ ប៉ុន្តែអ្នកចាំទីថ្មីដែលទើបឈ្នះ EURO 2020 Gianluigi Donnarumma ត្រូវបានលោក Mauricio Pochettino ដាក់បញ្ចូលក្នុងបញ្ជីឈ្មោះរួមជាមួយកីឡាករសំខាន់ៗផ្សេងទៀតដូចជា Marco Verratti, Marquinhos និង Angel Di Maria ជាដើម។

នៅថ្ងៃព្រហស្បតិ៍ម្សិលមិញនេះ អ្នកចាត់ការក្លិប PSG លោក Mauricio Pochettino ក៏មិនបាននិយាយអ្វីច្រើនឡើយ ជុំវិញឱកាសបង្ហាញខ្លួនរបស់ Messi ក្នុងការប្រកួតសប្តាហ៍នេះ ដោយលោកគ្រាន់តែបានលើកឡើងថា អ្វីៗគ្រប់យ៉ាងមានភាពល្អប្រសើរ ខណៈ Messi ផ្ទាល់ក៏មានអារម្មណ៍ល្អ និងអាចសម្របខ្លួនបានច្រើនជាមួយមិត្តរួមក្រុមថ្មីនៅទឹកដីបារាំង។

គួរឱ្យដឹងដែរថា ក្រោយផ្លាស់មកទឹកដីបារាំងដោយគ្មានតម្លៃផ្ទេរពីក្លិប Barcelona ម្ចាស់ជើងឯក Ballon D'or ៦សម័យ Lionel Messi នៅមិនទាន់បានបង្ហាញខ្លួនក្នុងការប្រកួតជាផ្លូវការជាមួយ PSG នៅឡើយទេ ដោយគេបានត្រឹមបង្ហាញខ្លួននៅកីឡដ្ឋាន និងអង្គុយទស្សនាផ្ទាល់អំឡុងពេលដែល PSG ឈ្នះ Strasbourg ដោយលទ្ធផល ៤-២ កាលពីសប្តាហ៍មុន។

PSG នឹងត្រូវទៅកាន់ទឹកដី Brest សម្រាប់ការប្រកួតសប្តាហ៍ទី៣ ដែលនឹងប្រកួតនៅម៉ោង ២ទាបភ្លឺឈានចូលថ្ងៃទី២១ ខែសីហាស្អែកនេះ៕