ភ្នំពេញ៖ សមត្ថកិច្ចខណ្ឌច្បារអំពៅបានចុះអនុវត្តពិនិត្យអាវុធជាតិផ្ទុះ និងជាតិស្រវឹង នៅចំណុចមុខមន្ទីរពេទ្យជោរៃ ផ្លូវជាតិលេខ១ ភូមិបឹងឈូក សង្កាត់និរោធ ខណ្ឌច្បារអំពៅ នៅយប់ថ្ងៃទី២៨ ខែមករា ដោយឃាត់បានរថយន្តម៉ាកឡិចស៊ីស៣៣០ ស្លាកលេខភ្នំពេញ 2BH-9687 ពណ៌ទឹកប៊ិច ១គ្រឿងដែលផ្ទុកគ្រឿងញៀន និងឃាត់ខ្លួនជនសង្ស័យចំនួន ២នាក់។

សមត្ថកិច្ចដកហូតបានវត្ថុតាងក្នុងរថយន្តនោះ រួមមានម្សៅក្រាមពណ៌សថ្លា (សង្ស័យគ្រឿងញៀន) ៥កញ្ចប់ធំស្មើ ៥គីឡូគ្រាម និងម្សៅកញ្ចប់ពណ៌ស្វាយមានអក្សរថៃ លេខ២០២៣ ចំនួន ១០០កញ្ចប់តូច ស្រោមអាវុធខ្លី១ មានគ្រាប់ចំនួន ៦គ្រាប់។ ជនសង្ស័យត្រូវបានសមត្ថកិច្ចកសាងសំណុំរឿងដើម្បីដោះស្រាយតាមនីតិវិធីច្បាប់

ក្នុងដំណើរត្រួតពិនិត្យនៅក្នុងខណ្ឌច្បារអំពៅកាលពីយប់មិញ សមត្ថកិច្ចឃាត់រថយន្តល្មើស ៤គ្រឿង ម៉ូតូល្មើស ២គ្រឿង ម៉ូតូអត់ពាក់មួក ១គ្រឿង ម៉ូតូស្រវឹងជាតិអាល់កុល ០,៤០ឡើង ១គ្រឿង រថយន្តស្រវឹងជាតិអាល់កុល ០,៤០ ឡើង ៤គ្រឿង ឃាត់ម៉ូតូស្រវឹង ១គ្រឿង រក្សាទុកនៅអធិការដ្ឋាននគរបាលច្បារអំពៅ និងជនសង្ស័យចំនួន ២នាក់។

សមត្ថកិច្ចគ្រប់បណ្តាខណ្ឌទាំង១៤ នៅរាជធានីភ្នំពេញ ចាប់ផ្តើមចុះអនុវត្តរឹតបន្តឹងច្បាប់ចរាចរណ៍ផ្លូវគោក ជាពិសេសត្រួតពិនិត្យគ្រឿងស្រវឹងតាំងពីយប់ថ្ងៃទី២៥ ខែមករា ដោយវិធានការនេះនឹងបន្តអនុវត្តជាប្រចាំ ដោយពុំមានការយោគយល់ឡើយ៕