កូរ៉េខាងត្បូង៖ ការព្រមានមួយអំពីផលប៉ះពាល់ដល់សុខភាពពីសំណាក់ក្រសួងចំណីអាហារកូរ៉េបានធ្វើឡើង ព្រមទាំងបានណែនាំឱ្យប្រជាជនកុំឱ្យបរិភោគឈើចាក់ធ្មេញបំពងដែលធ្វើពីម្សៅក្នុងទម្រង់ស្រដៀងនឹងដំឡូងបំពង បន្ទាប់ពីសកម្មភាពនេះបានល្បីតៗគ្នានៅលើបណ្ដាញសង្គម។ 

នៅលើវីដេអូក្នុងបណ្ដាញសង្គមបានបង្ហាញពីសកម្មភាពដែលមនុស្សមួយចំនួនបាននាំគ្នាញ៉ាំឧបករណ៍សម្រាប់ចាក់ធ្មេញមួយប្រភេទ ដែលក្រឡុកជាមួយម្សៅឈីសសម្រាប់បន្ថែមរសជាតិ ខណៈវីដេអូនេះបានទទួលការគាំទ្រ Like និង Share រាប់ពាន់នៅលើបណ្ដាញសង្គម Instagram និង TikTok។ ក្រសួង​សុវត្ថិភាព​ចំណីអាហារ និង​ឱសថបានបញ្ជាក់នៅលើសារមួយលើបណ្ដាញសង្គម X ដូច្នេះថា របស់ដែលគេនាំគ្នាបរិភោគនេះមិនធានាពីសុវត្ថិភាពនោះទេ។ សូមកុំទទួលទានវា។ សារខាងលើបន្ថែមថា វីដេអូនៃឈើចាក់ធ្មេញ ដែលជាផលិតផលអនាម័យ ត្រូវបានយកទៅចៀនដោយប្រើប្រេង និងយកទៅបរិភោគកំពុងមានភាពល្បីល្បាញខ្លាំងលើបណ្ដាញសង្គម។ 

គួរឱ្យដឹងថា ឈើចាក់ធ្មេញដែលគេយកមកបំពង និងក្រឡុកគ្រឿងបរិភោគនេះ ត្រូវបានគេដឹងថាវាផលិតពីម្សៅដំឡូងជ្វា ឬម្សៅពោត ហើយមានបន្ថែមពណ៌ផ្សេងៗ ដែលគេផលិតវាដើម្បីជៀសវាងពីការប្រើប្រាស់ផលិតផលប្លាស្ទិកដែលប៉ះពាល់ដល់បរិស្ថាន។ ជាទូទៅ ផលិតផលឈើចាក់ធ្មេញប្រភេទនេះត្រូវបានគេប្រើប្រាស់ក្នុងភោជនីយដ្ឋាននានា ក៏ដូចជាសម្រាប់ចាក់អាហារញ៉ាំដូចជាឈើចាក់ទូទៅធម្មតាដែរ។ 

គួរឱ្យដឹងថា កម្មវិធីបង្ហាញវីដេអូញ៉ាំអាហារលើអ៉ីនធ័រណេត ឬហៅថា Mukbang ដែលជារឿយៗមនុស្សនៅក្នុងវីដេអូតែងតែបរិភោគអាហារច្រើនៗខុសពីធម្មតា ឬមិនដូច្នោះទេក៏មានការបរិភោគអាហារប្លែកៗ ដែលវីដេអូបែបនេះតែងតែទទួលបានការចាប់អារម្មណ៍ខ្លាំងលើបណ្ដាញសង្គមរបស់កូរ៉េខាងត្បូង។ នៅក្នុងវីដេអូមួយដែលគេចាប់អារម្មណ៍ អ្នកបរិភោគឈើចាក់ធ្មេញបំពងនោះនិយាយថា "វា (ឈើចាក់ធ្មេញ) ស្រួយខ្លាំងណាស់"៕