ភ្នំពេញ៖ ឯកអគ្គរដ្ឋទូតអ៊ីស្រាអែលប្រចាំនៅកម្ពុជា លោកស្រី Orna Sagiv កាលពីថ្ងៃទី២៤ ខែមករា ឆ្នាំ២០២៤ បានទៅសួរសុខទុក្ខ និងចូលរួមរំលែកទុក្ខដល់គ្រួសារសពលោក ចាន់ ឧត្តម ដែលជានិស្សិតខ្មែរស្លាប់នៅក្នុងការវាយប្រហាររវាងក្រុមហាម៉ាស់ និងក្រុមអ៊ីស្រាអែលកាលពីថ្ងៃទី០៧ ខែតុលា ឆ្នាំ២០២៣។

លោកស្រីឯកអគ្គរដ្ឋទូត បានបញ្ជាក់ថា រដ្ឋាភិបាលអ៊ីស្រាអែលនឹងផ្តល់នូវជំនួយចាំបាច់ទាំងអស់ដល់គ្រួសារសពលោក ចាន់ ឧត្តម។

លោកស្រីបានសរសេរនៅក្នុងគណនីហ្វេសប៊ុកដូច្នេះថា៖ «ខ្ញុំសូមចូលរួមរំលែកទុក្ខដ៏ក្រៀមក្រំបំផុតទៅកាន់ឪពុកម្តាយរបស់គាត់ចំពោះការបាត់បង់កូនប្រុសជាទីស្រលាញ់។ វាជាបទពិសោធន៍ដ៏រំជួលចិត្តមួយក្នុងការជួប និងនិយាយជាមួយគ្រួសាររបស់គាត់ ហើយខ្ញុំបានសន្យាជាមួយពួកគេថា រដ្ឋាភិបាលអ៊ីស្រាអែលនឹងផ្តល់ឱ្យពួកគេនូវជំនួយចាំបាច់ទាំងអស់»។

គូសបញ្ជាក់ថា និស្សិតខ្មែរដែលស្លាប់នោះជានិស្សិតឆ្នាំទី៣ សិក្សានៅមហាវិទ្យាល័យវេជ្ជសាស្រ្តសត្វ នៃសាកលវិទ្យាល័យភូមិន្ទកសិកម្ម មានស្រុកកំណើតនៅស្រុកកោះធំ ខេត្តកណ្តាល៕