ភ្នំពេញ៖ ធា្លប់តែឃើញគ្រូបង្រៀនសិស្សនូវការរាំរបាំ និងរាំចង្វាក់ខ្មែរ ដល់សិស្សានុសិស្ស តែនេះប្លែកថាលោកគ្រូម្នាក់នេះបង្រៀនសិស្សធ្វើបង្គី អង្រុត ឈ្នៀង និងកញ្ចែ្រង ពីវល្លិផ្សេងៗនៅក្នុងមុខវិជ្ចាសិក្សាសង្គមថ្នាក់ទី៤ ដល់សិស្សក្មេងៗនៅសាលាបឋមសិក្សាច្រនៀង ស្ថិតក្នុងភូមិច្រនៀង ឃុំស្លែងស្ពាន ស្រុកស្រីស្នំ ខេត្តសៀមរាប។

លោកគ្រូ ស្វឿង វ៉ាន់ឌី ដែលមានវ័យ ៣០ឆ្នាំ បានចាប់ផ្តើមចូលបង្រៀនសិស្សអស់រយៈពេល ៩ឆ្នាំមកហើយ ពេលចូលបង្រៀននៅឆ្នាំដំបូងលោកគ្រូក៏ចាប់ផ្តើមបង្រៀនជំនាញនេះទៅក្មេងៗតែម្តង។ បង្គី អង្រុត ឈ្នៀង និងកញ្ចែ្រងដែលលោកគ្រូបង្រៀនទៅសិស្សក្មេងៗនេះ គឺធ្វើពីវល្លិយាវ វល្លិត្រី វល្លិខ្នឹង វល្លិជុច ឬវល្លិល្ពាក់។

លោកគ្រូបញ្ជាក់ថា លោកគ្រូយកជំនាញនេះមកបង្រៀនក្មេងៗនេះពីព្រោះចង់ឱ្យក្មេងៗជំនាន់ក្រោយបានស្គាល់ច្បាស់ និងបន្តថែរក្សានូវជំនាញធ្វើឧបករណ៍នេសាទខ្មែរពីបុរាណមួយនេះ បន្ថែមពីនេះពួកគាត់ក៏ចេះចាប់យកអាជីពធ្វើឧបករណ៍ប្រើប្រាស់នេះនៅថ្ងៃអនាគតផងដែរ។

តាមរយៈបទសម្ភាសជាមួយសារព័ត៌មាន EAC news លោកគ្រូ ស្វឿង វ៉ាន់ឌី បានបញ្ជាក់ដូច្នេះថា៖ «មូលហេតុដែលខ្ញុំបង្រៀនសម្ភារទៅក្មេងៗ ខ្ញុំចង់ឱ្យក្មេងបានចេះ និងដឹងពីរបៀបធ្វើ និងចេះថែរក្សារបស់ពីបុរាណដូនតាយើងពីដើម ហើយពេលគាត់ធំទៅ គាត់អាចបង្ហាត់បង្រៀនទៅក្មេងៗជំនាន់ក្រោយឱ្យចេះថែរក្សា ឱ្យបានស្គាល់ កុំឱ្យបាត់បង់ អាចពេលគាត់ធំទៅ អាចចាប់យកអាជីពតម្បាញសម្ភារៈផ្សេងៗទៀតក៏បាន និងសម្ភារៈដែលខ្ញុំបង្រៀននេះក៏បាន»។

លោកគ្រូ បញ្ជាក់ថា ក្រៅតែពីបង្រៀនក្មេងៗធ្វើបង្គី កញ្រ្ចែងនេះ លោកគ្រូក៏ចេះបង្រៀនពីរបៀបរាំចង្វាក់បុរាណខ្មែរ ដូចជារាំវង់ រាំក្បាច់ សារ៉ាវ៉ាន់ ឡាំលាវជាដើម។ ជាមួយគ្នានេះលោកគ្រូក៏បង្រៀនរាំរបាំគោះត្រឡោកជាដើម ដែលជំនាញទាំងអស់នេះលោកគ្រូចេះតាំងពីនៅរៀននៅសាលាគរុកោសល្យមកម៉្លេះ។ លើសពីនេះលោកគ្រូក៏បានបង្រៀនសិស្សអំពីរបៀបដាំបន្លែបង្ការផ្សេងៗនៅសួនក្នុងសាលាផងដែរ ដោយពេលនេះអាចទទួលបានផលជាបណ្តើរៗហើយ។

លោកគ្រូបានណែនាំឱ្យលោកគ្រូ អ្នកគ្រូដែលមានជំនាញផ្សេងទៀតជួយបង្ហាត់បង្រៀនដល់សិស្សដើម្បីក្លាយជាធនធានមនុស្សសម្រាប់ប្រទេសជាតិ និងឱ្យពួកគេបានស្គាល់នូវជំនាញផ្សេងៗដើម្បីបន្តអភិរក្សរបស់ដែលដូនតាបន្សល់ទុកដល់កូនចៅជំនាន់ក្រោយ៕