ស្វីស៖ អ្នកតំណាងជាន់ខ្ពស់របស់អ៊ុយក្រែនក្រោយពីបញ្ចប់កិច្ចប្រជុំការទូតកម្រិតខ្ពស់នៅមុនវេទិកាសេដ្ឋកិច្ចពិភពលោកក្នុងប្រទេសស្វីសថា ចិនគឺជាភាគីដែលត្រូវតែចូលរួមក្នុងការចរចាដើម្បីបញ្ចប់សង្រ្គាមរបស់ខ្លួនជាមួយរុស្ស៊ី។ លោក អេនទ្រី យើម៉ាក (Andriy Yermak) ប្រធានផ្នែកបុគ្គលិករបស់ប្រធានាធិបតីអ៊ុយក្រែនបាននិយាយនៅថ្ងៃអាទិត្យម្សិលមិញនេះថា អ៊៊ុយក្រែនបានមើលឃើញពីសារៈសំខាន់របស់ចិនដែលជាសម្ព័ន្ធមិត្តរបស់រុស្សី សម្រាប់វត្តមាននៅលើតុចរចា អំឡុងដែលរដ្ឋាភិបាលទីក្រុងគៀវ (Kyiv) កំពុងរៀបចំរូបមន្តស្វែងរកសន្តិភាពរបស់ខ្លួន។
នាយករដ្ឋមន្រ្តីចិន លោក លី ឈាំង (Li Qiang) នឹងដឹកនាំគណៈប្រតិភូធ្វើដំណើរទៅកាន់ទីក្រុង ដាវ៉ូស (Davos) ប្រទេសស្វីសនាសប្តាហ៍នេះដើម្បីចូលរួមកិច្ចប្រជុំវេទិកាសេដ្ឋកិច្ចពិភពលោក។ នៅពេលដែលអ្នកសារព័ត៌៌មានបានសួរថា តើប្រធានាធិបតីអ៊ុយក្រែនគ្រោងនឹងមានជំនួបជាមួយនាយករដ្ឋមន្រ្តីចិនឬទេ? លោក Yermak បានឆ្លើយថា យើងនឹងរង់ចាំមើលទាំងអស់គ្នា! ដោយលោកបន្ថែមថាលោកនៅមិនទាន់ទទួលបានពីកាលវិភាគ និងរបៀបវារៈចុងក្រោយនៃដំណើរមកកាន់កិច្ចប្រជុំរបស់លោក ហ្សេឡេនស្គី (Zelenskyy) នៅឡើយ។
គួរឱ្យដឹងថា លោក Zelenskyy គ្រោងនឹងធ្វើដំណើរដល់ទីក្រុង Bern ប្រទេសស្វីសនាថ្ងៃចន្ទនេះ ហើយគ្រោងនឹងមានជំនួបជាមួយប្រធានាធិបតីស្វីស លោកស្រី វីអូឡា អេមហឺត (Viola Amherd) ផងដែរ។ មិនត្រឹមតែប៉ុណ្ណោះ បើតាមប្រភពផ្សេងទៀតបានឱ្យដឹងថា លោក Zelenskyy ក៏អាចនឹងមានជំនួបជាមួយនាយកប្រតិបត្តិ (CEO) នៃក្រុមហ៊ុន JPMorgan បន្ថែមទៀត។ ដោយឡែក សមាជិកក្រុមប្រឹក្សាសហព័ន្ធស្វីស លោក Ignazio Cassis ដែលបានចូលរួមកិច្ចប្រជុំពិភាក្សាកាលពីថ្ងៃអាទិត្យ បានប្រាប់មកកាន់សន្និសីទសារព័ត៌មានថា "យើងត្រូវតែធ្វើអ្វីគ្រប់យ៉ាងដើម្បីបញ្ចប់សង្រ្គាមនេះ"។ លោក Cassis ថ្លែងថា៖ "ចិននឹងដើរតួយ៉ាងសំខាន់ ហើយយើងត្រូវតែធ្វើការងារជាមួយចិនដើម្បីដោះស្រាយបញ្ហានេះ"។
មន្ត្រីសហភាពអឺរ៉ុបមួយរូបបាននិយាយថា ប្រទេសជាសម្ព័ន្ធមិត្តលោកខាងលិចរបស់អ៊ុយក្រែនបានសម្តែងការគាំទ្រយ៉ាងច្បាស់លាស់ចំពោះរដ្ឋាភិបាលទីក្រុង Kyiv ព្រមទាំងផែនការសន្តិភាពរបស់ខ្លួន ដោយមានការអំពាវនាវដល់ប្រជាជាតិខាងត្បូង (Global South nations) ឱ្យបញ្ជាក់យ៉ាងច្បាស់ដល់ប្រទេសរុស្ស៊ីអំពីសារៈសំខាន់នៃការគោរពធម្មនុញ្ញអង្គការសហប្រជាជាតិ និងគោលការណ៍ស្នូលរបស់ខ្លួនក្នុងផលប្រយោជន៍សន្តិសុខពិភពលោក៕
