ភ្នំពេញ៖ នាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត បានប្រាប់ដល់ឪពុកម្តាយត្រូវលើកទឹកចិត្តកូនឱ្យខិតខំរៀនសូត្រ ជាជាងទៅអន្តរាគមន៍ដើម្បីចង់ឱ្យតែកូនជាប់ការប្រឡង។

ថ្លែងនៅក្នុងពិធីជួបសំណេះសំណាលជាមួយសិស្សនិទ្ទេស A ចំនួន ១ ៦៩១នាក់ ជាលើកទី១ នាព្រឹកថ្ងៃទី០៩ ខែមករា ឆ្នាំ២០២៤ សម្តេចធិបតីមានប្រសាសន៍ដូច្នេះថា៖ «វប្បធម៌ដែលបង្កើតឱ្យការប្រឡងនេះ គឺគ្រួសារនីមួយៗ ឪពុកម្តាយនីមួយៗ សិស្សម្នាក់ៗបានចូលរួមនៅក្នុងការខិតខំ ដោយដាក់បន្ទុកការជាប់ធ្លាក់គឺជារបស់ខ្លួន បានខិតខំជាងរត់ទៅរកអន្តរាគមន៍ តែប្រែមកជាការលើកទឹកចិត្តខិតខំរៀនសូត្រវិញ»។

សម្តេចនាយករដ្ឋមន្ត្រី បានលើកឡើងថា បើសិននៅតែបន្តអន្តរាគមន៍ឱ្យកូនទៀត នោះធ្វើឱ្យពួកគេមិនខិតខំរៀនសូត្រឡើយ ដោយអាងតែឪពុកម្តាយជាអ្នកជួយនៅក្រោយការប្រឡងរបស់ខ្លួន។

បើតាមសម្តេចធិបតី ការកែទម្រង់នៃការប្រឡងបាក់ឌុបកន្លងមក បានកែប្រែវប្បធម៌អន្តរាគមន៍របស់ឪពុកម្តាយអាណាព្យាបាល មកជាការជំរុញលើកទឹកចិត្តឱ្យកូនៗសង្វាតខិតខំរៀនសូត្រ។

តែយ៉ាងណាសម្តេចធិបតី បានជំរុញឱ្យសិស្សដែលមិនជាប់ការប្រឡងបាក់ឌុប បន្តការខិតខំរៀនសូត្របន្ថែមទៀត ពោលកុំមានការបោះបង់ការសិក្សា៕