ឥណ្ឌូណេស៊ី៖ អាជ្ញាធរបានបញ្ជាក់ថា មានមនុស្ស ៤នាក់បានស្លាប់ និង ២២នាក់បានរងរបួសក្នុងហេតុការណ៍ដ៏រន្ធត់មួយដែលរថភ្លើងចំនួន ២គ្រឿង មានផ្ទុកអ្នកដំណើររាប់រយនាក់បានបុកគ្នាយ៉ាងខ្លាំងកាលពីថ្ងៃសុក្រម្សិលមិញនេះ។ ទូរថភ្លើងខាងមុខនៃរថភ្លើងទាំងទាំងពីរ បានខូចខាតខ្ទេចខ្ទីទាំងស្រុង ខណៈទូផ្ទុកអ្នកដំណើរខាងក្រោយៗបានខ្ទាត និងក្រឡាប់ចាក់លើផ្លូវវាលស្រែនៅក្នុងខេត្តជ្វាខាងលិច (West java)។

ក្នុងហេតុការណ៍ខាងលើនេះ ត្រូវបានគេរាយការណ៍ថាអ្នកដំណើរលើរថភ្លើងប្រមាណជា ៥០០នាក់ ពុំមានអ្នកគ្រោះថ្នាក់ដល់បាត់បង់ជីវិតនោះទេ ខណៈអ្នកដែលស្លាប់ទាំង ៤នាក់នោះសុទ្ធតែជាកម្មករ និងបុគ្គលិករបស់រថភ្លើងទាំងអស់។ ប្រតិបត្តិករផ្លូវដែក PT KAI និយាយថា ការប៉ះទង្គិចនេះកើតឡើងរវាងរថភ្លើង intra-city ដែលមានផ្ទកអ្នកដំណើរ ២៨៧នាក់ បុកជាមួយនឹងរថភ្លើងមួយខ្សែទៀតមានផ្ទុកអ្នកដំណើរ ១៩១នាក់ នៅម៉ោងប្រហែលជា ៦ៈ០នាទីព្រឹក (ម៉ោងនៅឥណ្ឌូណេស៊ី)។ 

អ្នកនាំពាក្យនៃក្រុមហ៊ុន PT KAI បានបញ្ជាក់ថា៖ "ក្រុមហ៊ុន PT KAI មានការសោកស្ដាយជាខ្លាំង ហើយសូមចូលរួមរំលែកទុក្ខចំពោះការស្លាប់របស់បុគ្គលិកបម្រើការលើរថភ្លើងចំនួន ៤នាក់ រួមមានអ្នកបើករថភ្លើង, ជំនួយការអ្នកបើក អ្នកបម្រើលើរថភ្លើង និងសន្តិសុខ។" ពាក់ព័ន្ធទៅនឹងតួលេខនៃអ្នករងរបួសត្រូវបានផ្តល់ក្នុងចំនួនផ្សេងៗគ្នា ដោយប៉ូលិសបាននិយាយថា មនុស្ស ៣៧នាក់រងរបួស ខណៈក្រុមហ៊ុនបានអះអាងថាមានមនុស្ស ២២នាក់ប៉ុណ្ណោះដែលរងរបួស។

អ្នកនាំពាក្យប៉ូលិស លោក Ibrahim Tompo បញ្ជាក់ថា មនុស្សទាំងអស់ត្រូវបានជម្លៀសចេញពីក្នុងទូរថភ្លើង ខណៈអ្នករងរបួសត្រូវបានបញ្ជូនទៅសង្គ្រោះនៅមន្ទីរពេទ្យ។ យ៉ាងណាក្ដី លោកបានបញ្ជាក់ថា ក្រុមសង្គ្រោះនៅតែបន្តកកាយក្នុងគំនរដែករថភ្លើងដដែល ត្បិតមានជនរងគ្រោះម្នាក់បានស្លាប់ ហើយសាកសពមិនអាចយកចេញបានពីក្នុងទូរថភ្លើង ដោយសារតែកម្លាំងនៃការប៉ះទង្គិចបណ្ដាលឱ្យសាកសពមានសភាពខ្ទេចខ្ទីខ្លាំង៕