បន្ទាយមានជ័យ ៖ មន្ទីរអភិវឌ្ឍន៍ជនបទខេត្តបន្ទាយមានជ័យ បានរៀបចំវគ្គសិក្ខាសាលាបូកសរុបការងាររីកចម្រើនរបស់វិស័យផ្គត់ផ្គង់ទឹក និងអនាម័យជនបទប្រចាំឆ្នាំ២០២៣ កែសម្រួលតួនាទីនិងភារកិច្ចក្រុមការងារបច្ចេកទេសវិស័យផ្គត់ផ្គង់ទឹកស្អាតនិងអនាម័យថ្នាក់ក្រោមជាតិក្នុងខេត្ត ជូនដល់លោកលោកស្រី អ្នកពាក់ព័ន្ធ ធ្វើឡើងនៅមន្ទីរអភិវឌ្ឍន៍ជនបទខេត្ត នាព្រឹកថ្ងៃទី២៦ ខែធ្នូ ឆ្នាំ២០២៣។

ប្រធានមន្ទីអភិវឌ្ឍន៍ជនបទខេត្តបន្ទាយមានជ័យ លោក ជា យុទ្ធារុណ បានលើកឡើងថា អត្រាគ្របដណ្តប់ផ្នែកផ្គត់ផ្គង់ទឹកស្អាត និងអនាម័យនៅក្នុងខេត្ត មានភាពល្អបង្គួរក៏ពិតមែន ប៉ុន្តែអ្វីដែលត្រូវចាប់អារម្មណ៍នោះគឺ គ្រួសារប្រជាពលរដ្ឋភាគច្រើននៅឯជនបទ នៅតែបរិភោគទឹកស្រះ ត្រពាំង អាង បឹងបួរ ស្ទឹង អូរ ប្រឡាយដោយពុំបានឆ្លង កាត់ការច្រោះ ឬដាំឲ្យពុះទៅជាទឹកមានសុវត្ថិភាពដើម្បីហូបចុកនៅឡើយ។

លោកបញ្ជាក់ថា កត្តាទាំងអស់នេះហើយដែលធ្វើឲ្យមេរោគបានជ្រៀតចូលក្នុងសារពាង្គកាយបង្កឡើងជាជម្ងឺផ្សេងៗ ប៉ះពាល់ដល់សុខភាព សតិបញ្ញា ស្មារតី រំខានដល់ពេលវេលា ក្នុងការរកចំណូលចិញ្ចឹមជីវិតរបស់ប្រជាពលរដ្ឋ។

ក្នុងឱកាសនោះអភិបាលរងខេត្ត លោក ឃ្លោក នួយ បានអំពាវនាវអាជ្ញាធរមូលដ្ឋានភូមិ-ឃុំ ស្រុក-ក្រុង គ្រប់សាលារៀន មណ្ឌលសុខភាព វត្តអារាមត្រូវលើកកម្ពស់ការយកចិត្តទុកដាក់ក្នុងការអប់រំផ្សព្វផ្សាយ អំពីបញ្ហាសុខភាព-អនាម័យជូនដល់ប្រជាពលរដ្ឋ ឱ្យល់ជ្រួតជ្រាបពីការកែប្រែទម្លាប់ ដែលអាចផ្ដល់ផលជាវិជ្ជមានក្នុងការប្រតិបត្តិអនាម័យល្អដូចជា ការបរិភោគអាហារដែលទុកដាក់ប្រកបដោយអនាម័យ ការទទួលទានទឹកឆ្អិន ឬទឹកមានសុវត្ថិភាព ការបន្ទោងក្នុងបង្គន់អនាម័យ និង ការលាងសម្អាតដៃជាមួយសាប៊ូក្រោយពេលបន្ទោរបង់ និងមុនពេលបរិភោគអាហារជាដើម៕