បន្ទាយមានជ័យ៖ មេបញ្ជាការរង កងទ័ពជើងគោក មេបញ្ជាការយោធភូមិភាគទី៥ ឧត្តមសេនីយ៍ឯក ឯក សំអូន បានបញ្ជាទៅកងទ័ពក្រោមចំណុះពង្រឹងកិច្ចសហប្រតិបត្តិការជាមួយថៃក្នុងការទប់ស្កាត់បាតុភាពអសន្តិសុខដល់សង្គមជាតិ។

ការដាក់ផែនការនេះធ្វើឡើងក្នុងពេលដាក់សម្ពោធឱ្យប្រេីប្រាស់ជាផ្លូវការ អគារ និងសមិទ្ធផលនានា នៅទីបញ្ជាការ កងអនុសេនាធំទី២ វរសេនាតូចរថក្រោះ៦៧ ព្រឹកថ្ងៃទី២២ ខែធ្នូ ឆ្នាំ២០២៣។

ក្នុងឱកាសនោះលោកឧត្តមសេនីយ៍ឯក ឯក សំអូន បានណែនាំដល់បណ្តាកងឯកភាពទិសទី១ យោធភូមិភាគទី៥ ត្រូវខិតខំក៏សាងអង្គភាពឱ្យបានរឹងមាំ ពង្រឹងនូវសាមគ្គីភាព ក៏កសាងជំរំជម្រក ខិតខំបណ្តុះបណ្តាលធនធានមនុស្សនៅក្នុងអង្គភាព ឱ្យទទួលបាននូវចំណេះជំនាញថ្មី បម្រេីរដល់អង្គភាព។

លោកឧត្តមសេនីយ៍ឯក ក៏បានដាក់ផែនការយុទ្ធសាស្រ្តមួយចំនួនជូនដល់ទិសទី១ យោធភូមិភាគទី៥ ត្រូវពង្រឹងកិច្ចសហប្រតិបត្តិការ សហការជាមួយភាគីថៃ ក្នុងការទប់ស្កាត់ឱ្យម៉ឹងម៉ាត់ នូវបទល្មេីស បាតុភាពបង្កអសន្តិសុខដល់សង្គមជាតិ ទប់ស្កាត់និន្នការដែលធ្វេីឱ្យអស្ថរភាពសង្គម ដែលចំនុចនេះគឺជាការទទួលខុសត្រូវរបស់កងយោធពលខេមរភូមិន្ទ។ ជាពិសេសប្ដេជ្ញាការពារបូរណភាពទឹកដី ការពារ ព្រះមហាក្សត្រ ការពាររាជរដ្ឋាភិបាលស្របច្បាប់ ដែលប្រសូត្រចេញពីការបោះឆ្នោត ដែលមានសម្តេចមហាបវរធិបតី ហ៊ុន ម៉ាណែត ជាមគ្គុទេស ដ៏ឆ្នើមរបស់កម្ពុជា។

សូមបញ្ជាក់ថា អគារ និងសមិទ្ធផលនានា នៅទីបញ្ជាការ កងអនុសេនាធំទី២ វរសេនាតូចរថក្រោះ៦៧ ដែលជាអំណោយរបស់លោកឧត្តមសេនីយ៍ឯក ឯក សំអូន មេបញ្ជាការរង កងទ័ពជើងគោក មេបញ្ជាការយោធ ភូមិភាគទី៥ សប្បុរសជននិងយោធិនក្នុងអង្គភាព ចំណាយថវិកាសរុបចំនួន ៣២ ០២២ដុល្លារ៕