ព្រះសីហនុ៖ រដ្ឋមន្ត្រីក្រសួងសាធារណការលោក ប៉េង ពោធិ៍នា ក្រោយការសាងសង់ពង្រីកចំណតផែកុងតឺន័រទឹកជ្រៅថ្មីក្រុងព្រះសីហនុសាងសង់រួចនឹងអាចជួយកាត់បន្ថយការដឹកជញ្ជូនតាមសមុទ្របានប្រមាណ $២០០ ក្នុង ១ទូរកុងត័នឺរ។

លោករដ្ឋមន្ត្រីបានឲ្យដឹងក្នុងពេលដែលបើកការដ្ឋានសាងសង់ពង្រីកចំណតផែកុងតឺន័រទឹកជ្រៅថ្មី ជំហានទី១ នៅព្រឹកថ្ងៃសុក្រ ទី២២ ខែធ្នូ ឆ្នាំ២០២៣ នៅក្រុងព្រះសីហនុ ក្រោយពេលដែលសាងសង់ និងដាក់ឱ្យដំណើរការ កំពង់ផែនេះនឹងអនុញ្ញាតឱ្យនាវាប្រមាណ ៩៣% ក្នុងតំបន់ចូលចតហើយតម្លៃដឹកជញ្ជូនតាមសមុទ្រនឹងអាច កាត់បន្ថយបានប្រមាណ ២០០$ ក្នុង ១ទូកុងត័រនឺ។

លោករដ្ឋមន្ត្រីថា៖ «តម្លៃនេះគឺនឹងប្រហាក់ប្រហែល ជាមួយបណ្តាប្រទេសក្នុងតំបន់»។

គម្រោងសាងសង់ចំណតផែកុងតឺន័រទឹកជ្រៅថ្មី ជំហានទី១ មានប្រវែង ៣៥០ម៉ែត្រ ដែលមានជម្រៅទឹកសាងសង់ ១៤,៥ម៉ែត្រ អាចអនុញ្ញាតឱ្យនាវាកុងតឺន័រមានចំណុះផ្ទុក ៦ម៉ឺនតោន ឬស្មើនឹង ៤ពាន់TEUs ដែលមានផ្លូវដឹកជញ្ជូននៅក្នុងតំបន់អាស៊ីប៉ាស៊ីហ្វិក ទៅ-មក កំពង់ផែស្វយ័តក្រុងព្រះសីហនុ ហើយនឹងបង្កើនសមត្ថភាពកំពង់ផែសរុបកើនដល់ប្រមាណ ១,២៥លាន TEUs ក្នុងមួយឆ្នាំ។

គម្រោងសាងសង់នេះនឹងត្រូវបញ្ចប់នៅឆ្នាំ២០២៦ មានតម្លៃប្រមាណ ២៤៣លានដុល្លារ អាម៉េរិក៕