ភ្នំពេញ៖ ក្នុងរយៈពេល ២សប្តាហ៍នៃខែធ្នូនេះ ក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចេញវិញ្ញាបនបត្រចុះ បញ្ជីគម្រោងវិនិយោគចំនួន១៥ ដែលមានទុនវិនិយោគសរុបប្រមាណជាង ២៤៧លានដុល្លារអាម៉េរិក និងអាចបង្កើតការងារបានប្រមាណជាង ១៦ ០០០កន្លែង។

បើតាមសេចក្តីប្រកាសព័ត៌មានរបស់ CDC ក្នុងចំណោមគម្រោងវិនិយោគទាំង១៥នោះ ចំនួន ១៤គម្រោងស្ថិតក្នុងវិស័យឧស្សហកម្ម និង១គម្រោងស្ថិតនៅវិស័យហេដ្ឋារចនាសម្ព័ន្ធ និងផ្សេងៗ។

ក្នុងនោះមានគម្រោងវិយោគបង្កើតរោងចក្រកាត់ដេរ រោងចក្រផលិតស្បែកជើង រោងចក្រផលិតសម្ភារប្រើប្រាស់ក្នុងផ្ទះ បន្ទប់ទឹក និងគ្រឿងបង្គំវាំងនន រោងចក្រផលិតអំពូលភ្លើង អំពូលភ្លើងលំអ គ្រឿងអេឡិចត្រូនិក និងតុក្កតាសម្រាប់តាំងលំអសួនច្បារ និងគម្រោងវិនិយោគ អភិវឌ្ឍស្ថានីយផលិតអគ្គិសនីដើរដោយថាមពលពន្លឺព្រះអាទិត្យអានុភាព ១៥០មេហ្គាវ៉ាត់ ជាមួយប្រព័ន្ធផ្ទុក ថាមពលអគ្គិសនីខេត្តពោធិ៍សាត់ នៅស្រុកក្រគរ ខេត្តពោធិ៍សាត់។

គម្រោងវិនិយោគទាំង១៥នោះ ភាគច្រើនស្ថិតនៅក្នុងខេត្តកំពង់ស្ពឺ កណ្តាល តាកែវ ស្វាយរៀង កំពង់ចាម និងខេត្តព្រះសីហនុ៕