តូក្យូ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានផ្ដាំទៅក្រុមដែលប្រឆាំងនឹងសម្ដេច និងរដ្ឋាភិបាលកម្ពុជា ឱ្យមានសេចក្ដីថ្លៃថ្នូរនៅក្នុងខ្លួនកុំធ្វើអ្វីដែលធ្វើឲ្យប៉ះពាល់ដល់ប្រយោជន៍ និងមុខមាត់ជាតិដែលនាំឲ្យបរទេសមើលងាយ។

ថ្លែងក្នុងពិធីជួបជាមួយពលរដ្ឋខ្មែររស់នៅប្រទេសជប៉ុន ថ្ងៃទី១៦ ខែធ្នូ ឆ្នាំ២០២៣ នេះ សម្ដេចធិបតី ហ៊ុន ម៉ាណែត ថាសម្ដេចគាំទ្រនូវសិទ្ធិសេរីភាពរបស់មនុស្សតែសុំកុំឱ្យប្រើប្រាស់នូវសិទ្ធិសេរីភាពទាំងនោះបំពានទៅលើអ្នកដទៃ។ សម្ដេចបន្ថែមទៀតថាការប្រើប្រាស់ភាសាញុះញង់ឬក៏ភាសាមិនពិតវានាំឲ្យប៉ះពាល់ទៅដល់សេចក្ដីថ្លៃថ្នូររបស់មនុស្ស។

នៅក្នុងពិធីនេះដែរសម្ដេចក៏បានថ្លែងផ្ដាំទៅកាន់ក្រុមអ្នកនយោបាយប្រឆាំងនឹងរដ្ឋាភិបាលឲ្យចេះប្រើប្រាស់និងផ្ទៀងផ្ទាត់ការពិតផងដែរមុននឹងនិយាយឬផ្សព្វផ្សាយ។

ការផ្ដាំផ្ញើនេះគឺបន្ទាប់ពីមានក្រុមប្រឆាំង និងបណ្ដាញសារព័ត៌មានរបស់ពួកគេបានចុះថាលោក ហេង សួរ រដ្ឋមន្ត្រីក្រសួងការងារទទួលបានដីមួយរយហិចតាពីរដ្ឋ ដែលផ្ទុយពីការពិតទាំងស្រុង ខណៈអ្នកដែលទទួលបាននោះគឺមិនមែនជារដ្ឋមន្ត្រីក្រសួងការងារនោះទេប៉ុន្តែមានឈ្មោះដូចគ្នា។

សម្ដេចធិបតីបានបន្ថែមថាដោយសារតែការប្រើប្រាស់នូវភាសាកុហកបោកប្រាស់និងរឿងមិនពិតយ៉ាងនេះហើយទើបធ្វើឲ្យក្រុមប្រឆាំងកាន់តែរួមតូចនិងមានបញ្ហារហូតដល់សព្វថ្ងៃ៕