ភ្នំពេញ៖ សម្ដេចធិបតី ហ៊ុន ម៉ាណែត ត្រូវបានសមាជិកនៃអង្គសន្និបាតគណៈកម្មាធិការកណ្ដាលលើកទី៤៤ របស់គណបក្សប្រជាជនកម្ពុជាបោះឆ្នោតជ្រើសតាំងបន្ថែមជាអនុប្រធានគណបក្សប្រជាជនកម្ពុជាដែលធ្វើឲ្យគណបក្សមួយនេះមានអនុប្រធានចំនួន ៥រូប។

ការបោះឆ្នោតនេះគឺធ្វើឡើងក្នុងពេលដែលគណបក្សប្រជាជនបើកសន្និបាតគណៈកម្មាធិការកណ្ដាលលើកទី៤៤ នៅថ្ងៃអាទិត្យ ទី១០ ខែធ្នូ ឆ្នាំ២០២៣នេះ នៅវិមាន៧មករា ក្នុងខណ្ឌចំការមន រាជធានីភ្នំពេញ។

សំឡេងឆ្នោតគាំទ្រសម្ដេចធិបតីជាអនុប្រធានបក្សមានចំនួន ១ ១៨៧សំឡេង ដែលស្មើនឹង៩៩.៩២% ។

គួរឲ្យដឹងផងដែរថាបច្ចុប្បន្នគណបក្សប្រជាជនកម្ពុជាត្រូវបានដឹកនាំដោយសម្ដេចមហាពញាចក្រី ហេង សំរិន ជាប្រធានកិត្តិយស សម្ដេចតេជោ ហ៊ុន សែន ជាប្រធានគណបក្ស និងមានអនុប្រធានចំនួន ៤រូបដែលរួមមាន សម្ដេចក្រឡាហោម ស ខេង សម្ដេចវិបុលសេនាភក្ដី សាយ ឈុំ សម្ដេចពិជ័យសេនា ទៀ បាញ់ និងសម្ដេចកិត្តិសង្គហបណ្ឌិត ម៉ែន សំអន៕