សៀមរាប៖ គ្រឹះស្ថានអង្គរបានឱ្យដឹងថាក្នុងរយៈពេល ១១ខែនៃការលក់សំបុត្រជូនភ្ញៀវទេសចរណ៍បរទេសចូលទស្សនារមណីយដ្ឋានអង្គរ គ្រឹះស្ថានរបស់រដ្ឋមួយនេះរកចំណូលបានជាង ៣២លានដុល្លារអាមេរិក។
យោងតាមសេចក្តីប្រកាសព័ត៌មានរបស់ គ្រឹះស្ថានអង្គរ នៅថ្ងៃសុក្រ ទី១ ខែធ្នូ ឆ្នាំ២០២៣ បានបញ្ជាក់ថា រយៈពេល ១១ខែ ឆ្នាំ២០២៣ រមណីយដ្ឋានអង្គរ ទទួលបានភ្ញៀវអន្តរជាតិសរុប ៦៩៩ ៩៩៦នាក់ ដែលរកប្រាក់ចំណូលបាន ៣២ ៥៤៦ ៨៤៧ដុល្លារអាមេរិក។
ទន្ទឹមនោះដែរ ចំណូលពីការលក់បណ្ណនៅប្រាសាទកោះកែរ ភ្ញៀវទេសចរអន្តរជាតិ រយៈពេល ១១ខែ ក្នុងឆ្នាំ២០២៣ មានចំនួន ១២ ២៨០នាក់ ស្មើនឹង ១៨៤ ២០០ដុល្លារ។
ជាមួយគ្នានេះ គ្រឹះស្ថានអង្គរក៏ទទួលបានចំណូលពីការលក់សំបុត្រទូក ខែវិច្ឆិកា មានចំនួន ៥៩ ០៩៥ដុល្លារ ផងដែរ៕
ព័ត៌មានជាច្រើនទៀតសម្រាប់អ្នក
