កែប៖ រយៈពេល ៣ថ្ងៃ ក្នុងឱកាសឈប់សម្រាកនៃព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ចាប់ពីថ្ងៃទី២៦ ដល់ទី២៨ ខែវិច្ឆិកា ឆ្នាំ២០២៣ ខេត្តកែបបានទទួលភ្ញៀវទេសចរជាតិ-អន្តរជាតិ ជាង ៩ម៉ឺននាក់។ នេះបើយោងតាមមន្ទីរព័ត៌មានខេត្តកែប។
ក្នុងរបាយការណ៍ពី ប្រធានមន្ទីរទេសចរណ៍ខេត្តកែប លោក សោម ចិន្តា បានបញ្ជាក់ថា រយៈពេល ៣ថ្ងៃនៃការឈប់សម្រាកនេះ ចំនួនអ្នកទេសចរមកលេងកម្សាន្តនៅខេត្តកែបមានចំនួនសរុប ៩២ ៧៦១នាក់ ក្នុងនោះភ្ញៀវជាតិមាន ៩១ ៩៦៥នាក់ និងភ្ញៀវអន្តរជាតិ ៧៩៦នាក់។
ដោយឡែកសម្រាប់ថ្ងៃទី២៨ ដែលជាថ្ងៃចុងក្រោយនេះ ខេត្តកែបបានទទួលអ្នកទេសចរសរុប ៣៦ ៧៤២នាក់។
គួរឱ្យដឹងដែរថា ក្រៅពីមកលេងកម្សាន្តនៅក្រុងកែប ក្នុងនោះគេសង្កេតឃើញសន្ទុះភ្ញៀវទេសចរបានសម្រុកទៅលេងកម្សាន្តនៅឆ្នេរអង្កោល នៃស្រុកដំណាក់ចង្អើរ ដែលជាទិសដៅទេសចរណ៍ដ៏ពេញនិយមថ្មីមួយទៀតរបស់ខេត្តកែបផងដែរ៕
