ភ្នំពេញ៖ រដ្ឋមន្ត្រីក្រសួងអប់រំ យុវជន និងកីឡា ឧបនាយករដ្ឋមន្ត្រី ហង់ជួន ណារ៉ុន បានគូសបញ្ជាក់ថា រាល់ការប្រឡងសញ្ញាបត្រមធ្យមសិក្សាទុតិយភូមិ គឺក្រសួងអប់រំពុំដែលឱ្យមានការបែកធ្លាយវិញ្ញាសាមុនថ្ងៃប្រឡងមកដល់នោះទេ ពោលក្រសួងតែងតែធ្វើការគិតគូយ៉ាងម៉ត់ចត់ ដោយមានការចូលរួមពីអង្គភាពប្រឆាំងអំពើពុករលួយលើគ្រប់ដំណើរការប្រឡងទាំងអស់។

ក្រោយបើកវិញ្ញាសាដំបូងនៅវិទ្យាល័យព្រះស៊ីសុវត្ថិ នាព្រឹកម៉ោង៧ ថ្ងៃប្រឡងទី១ ថ្ងៃ០៦ ខែវិច្ឆិកា ឆ្នាំ២០២៣ លោក ហង់ជួន ណារ៉ុន បានថ្លែងមកកាន់អ្នកសារព័ត៌មានដូច្នេះថា៖ «យើងសូមបញ្ជាក់ថា មិនមានការបែកធ្លាយ (វិញ្ញាសា) ពីព្រោះយើងធ្វើគឺមានការម៉ត់ចត់ណាស់ សូម្បីសោរដែលត្រូវកាន់គឺត្រូវខុសគ្នាហើយមានការត្រួតពិនិត្យជាប្រចាំពីអង្គភាពប្រឆាំងអំពើពុករលួយមិនត្រឹមតែនៅលើក្រដាសទេ គឺនៅលើទំព័រហ្វេសប៊ុកទៀត»។

បើតាមលោក ហង់ជួន ណារ៉ុន ការប្រឡងបាក់ឌុបនៅឆ្នាំនេះ គឺជាការប្រឡងរឹតបន្តឹងឆ្នាំទី១០ហើយ ពោលពុំមានការបែកធ្លាយវិញ្ញាសាប្រឡងណាមួយឡើយ ខណៈកាលពីមុនប្រឡងឆ្នាំនេះពីរបីថ្ងៃ មានការបែកធ្លាយវិញ្ញាសាប្រវត្តិសាស្ត្រថ្នាក់វិទ្យាសាស្ត្រ ដោយក្រសួងអប់រំបានបដិសេដជុំវិញបញ្ហានេះ។

រដ្ឋមន្ត្រីក្រសួងអប់រំ យុវជន និងកីឡា បានថ្លែងថា៖ «ឆ្នាំនេះជាឆ្នាំលើកទី១ហើយ (ពុំមានការបែកធ្លាយវិញ្ញាសា) អាចថាជាចេតនានយោបាយអាក្រក់អីក៏បានដែរ ដើម្បីបន្តុះបង្អាប់។ កត្តានេះវាអត់ចំណេញដល់យុវជនយើងទេ»។

លោកបានអំពាវនាវដល់បេក្ខជនប្រឡងខិតខំប្រឹងប្រែងរៀនសូត្រជាជាងទៅរកវិញ្ញាសាបែកធ្លាយ។

គូសបញ្ជាក់ថា ការប្រឡងបាក់ឌុបឆ្នាំនេះមានបេក្ខជនចុះឈ្មោះប្រឡងចំនួន ១៣៧ ៤១២នាក់ ស្រី ៧៣ ២៧៨នាក់ ក្នុងនោះមានបេក្ខជនថ្នាក់វិទ្យាសាស្ត្រចំនួន ៤១ ៣៧៩នាក់ និងបេក្ខជនថ្នាក់វិទ្យាសាស្ត្រសង្គម ៩៦ ០៣៣នាក់។ ក្នុងនោះដែរ មានជនពិការគថ្លង់ចំនួន ១២នាក់ និងពិការភ្នែក ៦នាក់៕