ភ្នំពេញ៖ សមាគមមីក្រូហិរញ្ញវត្ថុកម្ពុជា បានច្រានចោលលើការចុះផ្សាយរបស់សារព័ត៌មានអង់គ្លេស The Guardian ដែលបានចុះផ្សាយក្នុងន័យថា មានពលរដ្ឋខ្មែរសម្លាប់ខ្លួនដោយសារជំពាក់បំណុល មីក្រូហិរញ្ញវត្ថុក្នុងចំណងជើងថា «ខ្ញុំខ្លាចថា ខ្ញុំអាចនឹងសម្លាប់ខ្លួនដូចប្តីរបស់ខ្ញុំ៖ ការរំលេចនូវក្រុមហ៊ុនផ្តល់កម្ចី បន្ទាប់ពីជនជាតិដើមភាគតិចធ្វើអត្តឃាត»។

ក្នុងសេចក្តីថ្លែងការចុះថ្ងៃអង្គារ៍ ទី១ ខែវិច្ឆិកា ឆ្នាំ២០២៣ សមាគមមីក្រូហិរញ្ញវត្ថុកម្ពុជាឱ្យលើកឡើងថា ការចុះផ្សាយនេះគឺគ្មានភស្ភុតាងណាមួយមកបញ្ជាក់នោះទេ។

សមាគមមីក្រូហិរញ្ញវត្ថុកម្ពុជាបានបញ្ជាក់ថា៖ «ផ្អែកតាមការស៊ើបអង្កេតការផ្ទៃក្នុងរបស់គ្រឹះស្ថានជាប់ពាក់ព័ន្ធ លទ្ធផលបានបង្ហាញថាគឺរកមិនឃើញភស្ភុតាងណាមួយបានបញ្ជាក់ថា៖ ១មានការកៀបសង្កត់ ឬអសីលធម៌ពីសំណាក់គ្រឹះស្ថាន ឬបុគ្គលិករបស់ខ្លួនឡើយ និង ទី២. មានការជាប់ពាក់ព័ន្ធគ្នារវាងការធ្វើអត្តឃាត និងកម្ចីរបស់គ្រឹះស្ថាននោះទេ»។

សមាគមមីក្រូហិរញ្ញវត្ថុកម្ពុជាគូសបញ្ជាក់ថានឹងបន្តតាមដានសមាជិករបស់ខ្លួន ដើម្បីធានាបាននូវការអនុវត្តដែលល្អ និងមិនអត់ឱនចំពោះការអនុវត្តផ្តល់កម្ចីដែលគ្មានវិន័យឥណទាន និងតាមដានរាល់ការការប្រកាន់ភ្ជាប់នូវក្រមសីលធម៌ និងគោលការណ៍ការពារអតិថិជន៕