បន្ទាយមានជ័យ៖ គ្រួសាររងគ្រោះដោយទឹកជំនន់ទឹកភ្លៀងដែលមានជីវភាពក្រីក្រចំនួន ២៤២គ្រួសារបានទទួលអំណោយមនុស្សធម៌ពីសាខាកាកបាទក្រហមកម្ពុជា ខេត្តបន្ទាយមានជ័យ។

ក្រុមការងារ សាខាកាកបាទក្រហមកម្ពុជា ដឹកនាំដោយលោក អ៊ុ រាត្រី ប្រធានគណៈកម្មាធិការសារ និងក្រុមការងារពាក់ព័ន្ធ បាននាំយកអំណោយមនុស្សធម៌សាខា ទៅសួរសុខទុក្ខគ្រួសាររងគ្រោះដោយទឹកជំនន់ចំនួន២៤២គ្រួសារ ដែលមកពីឃុំត់ត្រង់ស្រុកមង្គលបូរីចំនួន១០១គ្រួសារ សង្កាត់អូរអំបិលចំនួន៥០គ្រួសារ និងសង្កាត់ព្រះពន្លាក្រុងសិរីសោភ័ណចំនួន៩១គ្រួសារ។

ក្នុងឱកាសសាកសួរសុខទុក្ខនេះដែរ លោក អ៊ុ រាត្រី បាននាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចតែងតែគឹតគួរពីសុខទុក្ខប្រជាពលរដ្ឋដែលរងគ្រោះ និងប្រជាពលរដ្ឋងាយរងគ្រោះផ្សេងៗទៀត។

លោក អ៊ុ រាត្រី បានផ្តាំផ្ញើដល់ពលរដ្ឋដែលរងគ្រោះឱ្យបង្កើនការប្រុងប្រយ័ត្ន ចំពោះក្មេងតូចៗកុំចុះលេងទឹក ដែលនាំអោយបាត់បង់ជីវិត ព្រោះក្នុងរយៈពេលប៉ុន្មានថ្ងៃនេះករណីក្មេងលង់ទឹកស្លាប់នៅស្រុកអូរជ្រៅ និងស្រុកមង្គលបូរីមានជាបន្តបន្ទាប់ និង ប្រុងប្រយ័ត្នដល់សត្វអស្សេរពិស ទាំងអស់គ្នា និងពេលរដូវទឹកសម្រកត្រូវចេះសម្អាតបរិស្ថានជុំវិញផ្ទះ ដើម្បីសុខភាពពលរដ្ឋគ្រប់ៗគ្នា។

គួរឱ្យដឹងដែរថា អំណោយដែលសាខាកាកបាទក្រហមកម្ពុជា នាំមកចែកជូនគ្រួសាររងគ្រោះទទួលបាន អង្ករចំនួន ១៥គីឡូក្រាម, មីជាតិ១កេស, ត្រីខ១យួរ និងទឹកត្រី១យួរ៕