អាល្លឺម៉ង់៖ CEO ក្រុមហ៊ុន Tesla លោក Elon Musk កាលពីថ្ងៃពុធម្សិលមិញនេះ បានជួបពិភាក្សាផ្ទាល់ជាមួយថ្នាក់ដឹកនាំជាន់ខ្ពស់នៃរដ្ឋ Brandenburg។ នេះបើតាមការបញ្ជាក់របស់លោក Joerg Steinbach រដ្ឋមន្រ្តីក្រសួងសេដ្ឋកិច្ចរបស់អាល្លឺម៉ង់បានបង្ហោះសារបញ្ជាក់ប្រាប់នៅលើបណ្តាញ Twitter របស់លោក។
គួរឱ្យដឹងថា រដ្ឋ Brandenburg នេះ គឺជាទីតាំងដែលលោក Elon Musk បានចំណាយទឹកប្រាក់ជិត ៧ពាន់លានដុល្លារអាមេរិក ដើម្បីបង្កើតរោងចក្រថ្មីមួយរបស់លោកដែលមានឈ្មោះថា gigafactory។ បើតាមការបញ្ជាក់របស់រដ្ឋមន្រ្តីសេដ្ឋកិច្ចរបស់អាល្លឺម៉ង់ក៏បានឱ្យដឹងដែរថា ថ្នាក់ដឹកនាំកំពូលនៃរដ្ឋ Brandenburg លោក Dietmar Woidke ក៏មានវត្តមានក្នុងជំនួបនោះផងដែរ។
មែនទែនទៅ តាមគម្រោងរបស់ Tesla ការបើករោងចក្រ gigafactory ក្នុងប្រទេសអាល្លឺម៉ង់ គ្រោងនឹងធ្វើឡើងនៅចុងឆ្នាំ២០២១នេះ ប៉ុន្តែដោយសារបញ្ហារាំងស្ទះមួយចំនួន ជាពិសេសការមិនទាន់ទទួលបានការអនុម័តពីអាជ្ញាធរផ្នែកបរិស្ថាននៃរដ្ឋ Brandenburg ផ្ទាល់ បបានធ្វើឱ្យការប្រកាសពន្យារពេលបើកដំណើរការរោងចក្រនេះស្ថិតក្នុងភាពមន្ទិល ខណៈលោក Elon Musk ធ្លាប់បានរិះគន់ភាពស្មុគស្មាញនៃប្រព័ន្ធរដ្ឋបាលរបស់អាល្លឺម៉ង់កន្លងមកដែរកាលពីខែឧសភាកន្លងទៅ។
គួរបញ្ជាក់ថា គម្រោងសាងសង់រោងចក្រ Gigafactory ក្នុងប្រទេសអាល្លឺម៉ង់នេះ គឺជារោងចក្រសម្រាប់ផលិតថ្មផ្ទុកថាមពល សំនុំថ្ម ព្រមទាំងគ្រឿងបង្គុំសំខាន់ៗផ្សេងទៀតសម្រាប់ផ្គត់ផ្គង់ដល់ការផលិតរថយន្តអគ្គិសនី Tesla។ ក្រៅពីគម្រោងប៉ុន្មានដូចបានលើកឡើង រោងចក្រនេះក៏គ្រោងជាទីតាំងសម្រាប់ការផ្គុំនូវរថយន្ត Tesla ម៉ូដែល Y ផងដែរ៕
