ព្រះសីហនុ៖ នៅថ្ងៃឈប់សម្រាកបុណ្យភ្ជុំបិណ្ឌ ៣ថ្ងៃ ចាប់ពីថ្ងៃទី១៣ ដល់ថ្ងៃ១៥ ខែតុលា ឆ្នាំ២០២៣ ខេត្តព្រះសីហនុមានភ្ញៀវទេសចរជាតិ និងអន្តរជាតិទៅកម្សាន្តលេងសរុប ១៦១ ៤១៥នាក់ ក្នុងនោះ ភ្ញៀវជាតិ ១៥៧ ០៤៦នាក់ និងភ្ញៀវអន្តរជាតិសរុប ៤ ៣៦៩នាក់។ នេះបើតាមការបញ្ជាក់ឱ្យដឹងពីរដ្ឋបាលខេត្តព្រះសីហនុ។

ក្នុងខេត្តព្រះសីហនុ មានកន្លែងដ៏ទាក់ទាញជាច្រើនដូចជា ភ្ញៀវទេសចរអាចអញ្ជើញមកមើលរូបសំណាកធំ រូបសំណាកព្រះសិវៈ រូបសំណាកព្រះថោងនាងនាគ រូបសំណាកព្រះស្កន្ដរូបសំណាកសីង្ហរាជមុខបី មហាវិថី វិថី អនុវិថី ផ្លូវ ស្ពានជាច្រើនខ្សែទើបសាងសង់រួច។

ជាមួយគ្នានេះ អាចគយគន់មើលទឹកសមុទ្រ ហែលទឹក និងមកញ៉ាំមឹកអាំង គ្រឿងសមុទ្រស្រស់ៗ នៅតាមឆ្នេររាម ឆ្នេរអូត្រេះ ឆ្នេរអូរឈើទាល ឆ្នេរខ្សាច់ សក្បុស ទៅលេងកោះមានទេសភាពស្អាត កោះរ៉ុង កោះរ៉ុងសន្លឹម កោះសង្សា កោះសំពោច (កោះរាជបុត្រ) កោះក្របី កោះឬស្សី ទឹកធ្លាក់ថ្មរូង ទឹកស្ទឹងប៉ូតាតាំ ឆ្នេរតាបារាំង ឆ្នេរថ្មយក្ស ទឹកធ្លាក់ព្រៃនប់ ក្បាលឆាយ និងកសិដ្ឋានអូរទ្រីស ជាដើម៕