ភ្នំពេញ៖ អតីតនាយករដ្ឋមន្ត្រីកម្ពុជា សម្តេចតេជោ ហ៊ុន សែន និងប្រធាន Nippon Foundation លោក យូហេ សាសាកាវ៉ា នឹងរួមដំណើរជាមួយគ្នាទៅបំពេញទស្សនកិច្ចនៅប្រទេសមីយ៉ាន់ម៉ាខាងមុខនេះ។ នេះបើតាមការបញ្ជាក់ឱ្យដឹងនៅក្នុងកិច្ចជំនួបរវាងសម្តេចតេជោ និងលោក យូហេ សាការ៉ា នៅវិមាន៧មករា នាព្រឹកថ្ងៃទី១១ ខែតុលា ឆ្នាំ២០២៣។

ដំណើរទស្សនកិច្ចទៅប្រទេសមីយ៉ាន់ម៉ារួមគ្នានេះ គឺជាការប្តេជ្ញាចិត្តរួមគ្នារបស់មេដឹកនាំទាំងពីរ។ លោក យូហេ សាសាកាវ៉ា បានកោតសរសើរដល់សម្តេចតេជោ ដែលជាតួអង្គសំខាន់ដែលអាចផ្តល់នូវភាពល្អប្រសើរដល់មីយ៉ាន់ម៉ារបាន នូវអ្វីដែលមីយ៉ាន់ម៉ារកំពុងជួបប្រទះនោះ គឺកម្ពុជាធ្លាប់ជួបកន្លងមកហើយ ប៉ុន្តែសម្តេចតេជោបានប្រែក្លាយបញ្ហាទាំងអស់នោះ មកកាន់សន្តិភាពដ៏ល្អប្រសើរ។

ប្រធាន Nippon Foundation ក៏បានកោតសរសើរដល់សម្តេចតេជោដែលបានធ្វើឲ្យកម្ពុជាប្រែក្លាយពីប្រទេសដែលធ្លាប់មានសង្រ្គាម ធ្លាប់មានវិបត្តិធ្ងន់ធ្ងរ បញ្ហាស្មុគស្មាញជាច្រើន មកជាប្រទេសដែលមានសុខសន្តិភាពពេញលេញ និងមានការអភិវឌ្ឍជឿនលឿនដ៏អស្ចារ្យ។

ជាមួយគ្នានេះលោកក៏បានស្នើសុំសម្តេចតេជោធ្វើការចែករំលែកនូវរាល់ស្នាដៃ និងបទពិសោធន៍នៃការដឹកនាំរបស់សម្តេច ដើម្បីឲ្យរូបលោកចងក្រងជាឯកសារ នៃការដឹកនាំរបស់សម្តេច ដើម្បីឲ្យពួកគាត់បានអានទុកជាមេរៀន សម្រាប់ជីវិតរបស់ពួកគាត់៕