ក្នុងឆ្នាំ២០២៤ កម្មករនិយោជិតនៃសហគ្រាស គ្រឹះស្ថានទាំងអស់ឈប់សម្រាកបាន ២២ថ្ងៃពីការងារដោយមានប្រាក់ឈ្នួល
ភ្នំពេញ៖ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានសេចក្តីប្រកាសស្តីពីការឈប់បុណ្យដែលមានប្រាក់ឈ្នួល ប្រចាំឆ្នាំ២០២៤ ដោយក្នុងនោះត្រូវបានអនុញ្ញាតឱ្យកម្មករនិយោជិតនៃសហគ្រាស គ្រឹះស្ថានទាំងអស់បានឈប់សម្រាកពីការងារដោយមានប្រាក់ឈ្នួល។
សេចក្តីប្រកាសនៅថ្ងៃចន្ទ ទី២ ខែតុលា ឆ្នាំ២០២៣ បានឱ្យដឹងថា កម្មករនិយោជិតនៃសហគ្រាស គ្រឹះស្ថានទាំងអស់ ដែលមានចែងក្នុងមាត្រា១ នៃច្បាប់ស្តីពីការងារ បានឈប់សម្រាកពីការងារដោយមានប្រាក់ឈ្នួលរួមមាន ៤ថ្ងៃសម្រាប់បុណ្យចូលឆ្នាំថ្មីប្រពៃណីជាតិ ៣ថ្ងៃសម្រាប់ពិធីបុណ្យភ្ជុំបិណ្ឌ និង៣ថ្ងៃសម្រាប់ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ។
ជាមួយគ្នានេះ ថ្ងៃបុណ្យផ្សេងទៀតដែលឈប់សម្រាកមានប្រាក់ឈ្នួលរួមមាន ទិវាចូលឆ្នាំសកល ទិវាជ័យជម្នះលើរបបប្រល័យពូជសាសន៍ ទិវានារីអន្តរជាតិទិវាពលកម្មអន្តរជាតិ ព្រះរាជពិធីបុណ្យចម្រើនព្រះជន្មព្រះមហាក្សត្រនៃព្រះរាជាណាចក្រកម្ពុជា ពិធីបុណ្យវិសាខបូជា ព្រះរាជពិធីច្រត់ព្រះនង្គ័ល ព្រះរាជពិធីបុណ្យចម្រើនព្រះជន្មសម្តេចព្រះវររាជមាតាជាតិខ្មែរ ទិវាប្រកាសរដ្ឋធម្មនុញ្ញ ទិវាប្រារព្ធព្រះវិញ្ញាណក្ខន្ធព្រះបរមរតនកោដ្ឋ ព្រះរាជពិធីគ្រងព្រះបរមរាជសម្បត្តិព្រះមហាក្សត្រ និងពិធីបុណ្យឯករាជ្យជាតិ។
សេចក្តីប្រកាសដដែលគូសបញ្ជាក់ថា ចំពោះសហគ្រាស គ្រឹះស្ថានទាំងឡាយណា ដែលកម្មវត្ថុអាជីវកម្មប្រព្រឹត្តទៅជាប្រចាំ និងមិនអាចបញ្ឈប់សកម្មភាពបាន សហគ្រាស គ្រឹះស្ថាន នោះម្ចាស់ ឬ នាយកសហគ្រាស គ្រឹះស្ថាន ត្រូវរៀបចំបែងចែកឱ្យកម្មករនិយោជិតបានឈប់សម្រាកទៅតាមថ្ងៃបុណ្យនីមួយៗ ដោយផ្លាស់ប្តូរគ្នា។
រដ្ឋមន្រ្តីក្រសួងការងារក៏បញ្ជាក់ក្នុងសេចក្តីប្រកាសដែរថា ក្នុងអំឡុងពេលនៃការឈប់សម្រាកដោយផ្លាស់ប្ដូរគ្នានេះ ម្ចាស់ ឬនាយកសហគ្រាស គ្រឹះស្ថានអាចប្រើប្រាស់ កម្មករនិយោជិតផ្សេងជាបណ្ដោះអាសន្នមកជំនួសកម្មករនិយោជិតដែលបានឈប់សម្រាក៕