ភ្នំពេញ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានសម្រេចចុះហត្ថលេខាបញ្ចុះតម្លៃពន្ធនាំចេញលើមុនទំនិញថ្មធម្មជាតិទាំងកែច្នៃ និងមិនទាន់កែច្នៃពី ២០ ទៅ២៥% ដែលក្នុងនោះក៏មានការដកពន្ធចេញទាំងអស់លើទំនិញថ្មធម្មជាតិកែច្នៃចេញពីប្រទេសកម្ពុជាចំនួន ១២បន្ទាត់ពន្ធគយផងដែរ។
ក្នុងសេចក្ដីសម្រេចចុះថ្ងៃទី២៩ ខែកញ្ញា ឆ្នាំ២០២៣នេះ សម្ដេចធិបតី ហ៊ុន ម៉ាណែត បានសម្រេចបញ្ជុះតម្លៃពន្ធអាករនាំចេញថ្មធម្មជាតិមិនទាន់កែច្នៃពី៣០% មក១០% និងបញ្ចុះតម្លៃលើអាត្រាអាករនាំចេញលើថ្មធម្មជាតិមិនទាន់កែច្នៃទម្រង់ជាផ្ទាំងពី៣០% មក៥% និងបញ្ចុះតម្លៃលើថ្មធម្មជាតិកែច្នៃពី២០% មក ០% ដែលនឹងចាប់អនុវត្តន៍ពីថ្ងៃទី១ ខែតុលា ឆ្នាំ២០២៣ តទៅ។
សម្ដេចធិបតី ហ៊ុន ម៉ាណែត បានលើកឡើងក្នុងបណ្ដាញសង្គមរបស់សម្ដេចនៅព្រឹកថ្ងៃសុក្រនេះថា ការសម្រេចបញ្ចុះតម្លៃនេះគឺបន្ទាប់ពីសម្ដេចបានទទួលយកសំណូមពររបស់អាជីករនាំចេញថ្មធម្មជាតិពីកម្ពុជាមួយរូបពេលដែលសម្ដេចអញ្ជើញទៅចូលរួមពិពណ៌អាស៊ាន-ចិនលើកទី២០ កាលពីថ្ងៃទី១៧ កញ្ញា។
សម្ដេចលើកឡើងថា៖ «ថ្ងៃនេះខ្ញុំបានចុះហត្ថលេខាលើអនុក្រឹត្យ អនុញ្ញាតឱ្យបញ្ចុះអត្រាអាករនាំចេញលើមុខទំនិញថ្មធម្មជាតិសម្រាប់នាំចេញមួយចំនួន ក្នុងគោលដៅជួយសម្រាលបន្ទុកដល់ក្រុមហ៊ុននាំចេញថ្មធម្មជាតិ និងជួយដល់ការប្រកួតប្រជែងនៃផលិតផលថ្មធម្មជាតិខ្មែរ នៅលើទីផ្សារអន្តរជាតិ»៕
