ភ្នំពេញ៖ ប្រាក់ឈ្នួលអប្បបរមាកម្មករនិយោជិតសម្រាប់ឆ្នាំ២០២៤ ឡើងបាន ៤ដុល្លារ ពី ២០០ដុល្លារ ទៅ ២០៤ដុល្លារក្នុងមួយខែ។ ប្រាក់ឈ្នួលនេះនឹងអនុវត្តនៅដើមឆ្នាំ២០២៤។ នេះបើតាមលទ្ធផលកិច្ចប្រជុំសម្រេចចុងក្រោយរវាងភាគីសហជីព និយោជក និងតំណាងរាជរដ្ឋាភិបាល។

កិច្ចប្រជុំពិភាក្សាចរចាកាលពីថ្ងៃទី១៨ ខែកញ្ញា ឆ្នាំ២០២៣ តំណាងភាគីកម្មករនិយោជិតបានដាក់តួលេខ ២០៤ដុល្លារ ដោយមានសំឡេងគាំទ្រ១២លើ១៧នាក់ និង ២១៣ដុល្លារមានសំឡេងគាំទ្រ ៥ លើ ១៧នាក់។ ចំណែកតំណាងភាគីនិយោជកបានកំណត់ត្រឹម ២០១,៥ដុល្លារ។

តាមការចរចាអស់ជាច្រើនលើក តំណាងកម្មករ និយោជក និងតំណាងរដ្ឋាភិបាលបានសម្រេចដំឡើងប្រាក់ឈ្នួលកម្មករពី ២០០ដុល្លារ ទៅ ២០៤ដុល្លារសម្រាប់ឆ្នាំ២០២៤។

គូសបញ្ជាក់ថា នៅក្នុងឆ្នាំ២០២៣នេះ ប្រាក់ឈ្នួលអប្បបរមារបស់កម្មករនិយោជិតក្នុងវិស័យវាយនភណ្ឌ កាត់ដេរសម្លៀកបំពាក់ ផលិតស្បែកជើង និងផលិតផលធ្វើដំណើរនិងកាបូប គឺមានចំនួន ២០០ដុល្លារក្នុងមួយខែ ហើយ ប្រសិនបើបូកនិងប្រាក់អត្ថប្រយោជន៍ផ្សេងៗបន្ថែម កម្មករនិយោជិតម្នាក់អាចទទួលបានប្រាក់ឈ្នួល ចន្លោះពី ២១៧ ទៅ ២២៨ដុល្លារអាម៉េរិកក្នុងមួយខែ៕