ភ្នំពេញ៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្ស៊ែលឡិនស្គី (Volodymyr Zelenskyy) បានផ្ញើលិខិតអបអរសាទរ កិត្តិទេសាភិបាលបណ្ឌិត ហ៊ុន ម៉ាណែត ដែលត្រូវបានចាត់តាំងជានាយករដ្ឋមន្ត្រីកម្ពុជា។ ជាមួយគ្នានេះ លោកក៏បានអញ្ជើញនាយករដ្ឋមន្ត្រីទៅទស្សនកិច្ចនៅប្រទេសអ៊ុយកែ្រន។

ក្នុងលិខិតអបអរសាទរដល់នាយករដ្ឋមន្ត្រីកម្ពុជាដែលត្រូវបានក្រសួងការបរទេស និងសហប្រតិបត្តិការអន្តរជាតិចេញផ្សាយនៅថ្ងៃទី២៩ ខែសីហា ឆ្នាំ២០២៣ បានបញ្ជាក់ឱ្យដឹងថា លោក ហ្ស៊ែលឡិនស្គី មានទំនុកចិត្តថា តួនាទីនាយករដ្ឋមន្ត្រីរបស់លោក ហ៊ុន ម៉ាណែត នឹងរួមចំណែកដល់ការរីកចម្រើនប្រទេសទៅលើឆាកអន្តរជាតិ។

លោកប្រធាធិបតីអ៊ុយក្រែនថ្លែងថា៖ «ទំនាក់ទំនងមិត្តភាពរវាងរដ្ឋរបស់យើងនឹងទទួលបាននូវលក្ខណៈជាក់ស្តែងថ្មីប្រកបដោយគុណភាព»។

លោកបានកោតសរសើរដល់កម្ពុជាដែលគាំទ្របូរណភាពទឹកដី និងអធិបតេយ្យភាពអ៊ុយក្រែន ការការពារនីតិរដ្ឋ និងសណ្តាប់ធ្នាប់ក្នុងសង្គ្រាមរុស្ស៊ីប្រឆាំងនឹងអ៊ុយក្រែន និងផ្តល់ជំនួយដល់ប្រទេសអ៊ុយក្រែនពីការដោះមីនមនុស្សធម៌នៅអ៊ុយក្រែន។

លោកប្រធានាធិបតីអ៊ុយក្រែន លោក វ៉ូឡូឌីមៀ ហ្ស៊ែលឡិនស្គី ក៏បានអញ្ជើញនាយករដ្ឋមន្ត្រីកម្ពុជា ធ្វើទស្សនកិច្ចនៅប្រទេសអ៊ុយក្រែន៕