ភ្នំពេញ៖ បុរសម្នាក់ដែលលើកដៃទះកំភ្លៀងលើស្ត្រីម្នាក់ដែលជិះម៉ូតូសាចទឹកដាក់កាលពីល្ងាចថ្ងៃសុក្រទី២៥ ខែសីហា ឆ្នាំ២០២៣ ពេលនេះត្រូវបានអធិការដ្ឋាននគរបាលខណ្ឌសែនសុខឃាត់ខ្លួននៅថ្ងៃចន្ទនេះបន្ទាប់ពីទទួលបានពាក្យបណ្តឹងពីស្ត្រីជនរងគ្រោះ។

អធិការនៃអធិការដ្ឋាននគរបាលខណ្ឌសែនសុខ លោកវរសេនីយ៍ឯក ហួរ ម៉េងវ៉ាង បានបញ្ជាក់មក EAC news យ៉ាងខ្លីថា សមត្ថកិច្ចខណ្ឌសែនសុខបានស្រាវជ្រាវឃាត់ខ្លួនបានបុរសដែលហ៊ានលើកដៃវាយលើស្ត្រីនៅសាធារណៈនៅថ្ងៃនេះដើម្បីបន្តអនុវត្តតាមនីតិវិធីជាបន្តទៀត។

គូសបញ្ជាក់ថា កាលពីល្ងាចថ្ងៃសុក្រសប្តាហ៍មុន មានការឈ្លោះប្រកែកគ្នានៅសាធារណៈរវាងបុរសម្នាក់ និងបងប្អូនបង្កើតប្រុស-ស្រី ២នាក់ ដែលបានជិះម៉ូតូសាចទឹកដាក់លើបុរសនោះបណ្តាលឱ្យបុរសរូបនោះខឹងយ៉ាងខ្លាំង ដោយលើកដៃទះកំភ្លៀងលើស្ត្រីនោះមួយដៃយ៉ាងពេញទំហឹង បើទោះបីបងប្អូន ២នាក់នោះបានពោលពាក្យសុំទោសក៏ដោយ។

សកម្មភាពហិង្សានេះត្រូវបានពលរដ្ឋម្នាក់បានថតជាវីដេអូ និងបង្ហោះលើបណ្តោញសង្គមហ្វេសប៊ុកបង្កឱ្យមានការបញ្ចេញរិះគន់លើបុរសរូបនោះយ៉ាងចាស់ដៃ៕