ភ្នំពេញ៖ អតីតនាយករដ្ឋមន្ត្រី សម្ដេចតេជោ ហ៊ុន សែន និងអតីតប្រធានរដ្ឋសភា សម្ដេចពញាចក្រី ហេង សំរិន ត្រូវបានព្រះមហាក្សត្រតែងតាំងជាប្រធាន និងប្រធានកិត្តិយសនៃឧត្តមក្រុមប្រឹក្សាផ្ទាល់ព្រះមហាក្សត្រ មានឋានៈស្មើនាយករដ្ឋមន្ត្រី។

ការតែងនេះធ្វើឡើងនៅថ្ងៃទី២២ ខែសីហា បន្ទាប់ពីរដ្ឋសភាបានបោះឆ្នោតបង្កើតរាជរដ្ឋាភិបាល និងសភាសម្រាប់អាណត្តិទី៧រួចនៅពេលព្រឹក។ ព្រះមហាក្សត្រសម្ដេចព្រះនរោត្តម សីហមុនី បានឆ្វេងយល់ថាសម្ដេចទាំងពីរគឺជាមេដឹកនាំដែលជាទីគោរពស្រលាញ់របស់ជាតិ ដែលបានដឹកនាំប្រទេសឱ្យទទួលបានសន្ដិភាព ស្ថិរភាព ឯកភាព ការអភិវឌ្ឍជាតិលើគ្រប់វិស័យ ការពារលទ្ធិប្រជាធិបតេយ្យ និងមានកិច្ចសហប្រតិបត្តិអន្តរជាតិល្អ រក្សាបានឯករាជ្យជាំតិ និងបូរណភាពទឹកដី ព្រមទាំងចូលរួមកសាង និងគោរពព្រះពុទ្ធសាសនា ព្រមទាំងសាសនាផ្សេងទៀតឱ្យមានការរីកចម្រើនទូទាំងប្រទេសកម្ពុជា។

ការត្រាស់បង្គាប់តែងតាំងនេះក៏ដោយសារព្រះអង្គឆ្វេងយល់ថាសម្ដេចមានស្វាមីភក្តិចំពោះរាជបល្ល័ង្គ ការពារនិរន្តរភាពរាជានិយមនៃព្រះរាជាណាចក្រកម្ពុជាផងដែរ។

ក្រៅពីតែងតាំងសម្ដេចតេជោ ហ៊ុន សែន ជាប្រធានក្រុមប្រឹក្សាផ្ទាល់ព្រះមហាក្សត្រ និងសម្ដេចពញាចក្រី ហេង សំរិន ជាប្រធានកិត្តិយសនៃក្រុមប្រឹក្សាផ្ទាល់ព្រះមហាក្សត្រ។ សម្ដេចព្រះបរមនាថ នរោត្តម សីហមុនី ក៏បានត្រាស់បង្គាប់តែងតាំងសម្ដេចក្រឡាហោម ស ខេង សម្ដេចពិជ័យសេនា ទៀ បាញ់ និង សម្ដេចកិត្តិសង្គហបណ្ឌិត ម៉ែន សំអន ជាឧត្តមប្រឹក្សាផ្ទាល់ព្រះមហាក្សត្រផងដែរ ដែលមានឋានៈស្មើឧបនាយករដ្ឋមន្ត្រី៕