បាត់ដំបង៖ ក្រសួងបរិស្ថានបានសម្រេចផាកពិន័យចំពោះក្រុមហ៊ុន Phoenix Industrial Co.Ltd ចំនួន ៤៦៨ ៥៦០ដុល្លារអាមេរិក ដោយសារតែបានបង្ហូរសំណល់រាវចូលក្នុងទឹកស្ទឹងសង្កែបណ្តាលឱ្យទឹកប្រែជាពណ៌ខ្មៅ និងត្រីងាប់ជាច្រើនក្បាលកាលពីដើមខែសីហា ឆ្នាំ២០២៣ កន្លងទៅ។

តាមសេចក្តីជូនដំណឹងរបស់ក្រសួងបរិស្ថានដែលផ្ញើទៅនាយកក្រុមហ៊ុន Phoenix Industrial Co.Ltd កាលពីថ្ងៃទី១០ ខែសីហា ឆ្នាំ២០២៣ ក្រសួងបរិស្ថានតម្រូវឱ្យក្រុមហ៊ុនផ្តល់សសំណងផលប៉ះពាល់បរិស្ថានដោយផ្ទាល់ចំនួន ៩៣ ៥៦០ដុល្លារ និងដោយប្រយោលចំនួន ៣៧៥ ០០០ដុល្លារ ដោយត្រូវបង់មកកាន់គណនីយនៃគណៈកម្មាធិការមូលនិធិបរិស្ថាន និងសង្គម (គ.ម.ប.ស) ឱ្យបានរួចរាល់មុនថ្ងៃទី២០ ខែតុលា ឆ្នាំ២០២៣ ជាកំហិត។

ជាមួយគ្នានេះក្រសួងបរិស្ថានតម្រូវឱ្យក្រុមហ៊ុនប្តូរទីតាំងរោងចក្រចេញពីតំបន់នេះ ទៅតំបន់ផ្សេងទៀតដែលនៅឆ្ងាយពីប្រភពទឹកស្ទឹងសង្កែយ៉ាងតិច ១០គីឡូម៉ែត្រ និងតម្រូវឱ្យក្រុមហ៊ុនស្តារបរិស្ថានឡើងវិញនៅក្នុង និងជុំវិញទីតាំងរោងចក្រឱ្យបានរួចរាល់មុនថ្ងៃទី២០ ខែវិច្ឆិកា ឆ្នាំ២០២៣។

ក្នុងករណីក្រុមហ៊ុនមិនរាងចាល ក្រសួងបរិស្ថាននឹងបន្តពិន័យអន្តរការណ៍ចំនួន ១៥០លានរៀល ពាក់ព័ន្ធនឹងបទល្មើសដូចជា បង្កឱ្យមានការបំពុលទឹកស្ទឹងសង្កែ និងត្រីពុលងាប់ ដោយពិន័យ ៣០លានរៀល ពិន័យ ៣០លានរៀលចំពោះករណីមានចេតនាធ្វើឱ្យលេចធ្លាយ ឬមានចេតនាបញ្ចេញសំណល់រាវដោយមិនឆ្លងកាត់ការសម្អាត ពិន័យ ៣០លានរៀល លើករណីមិនបានអនុវត្តតាមលិខិតបញ្ជាកែប្រែរបស់ក្រសួងបរិស្ថាន ពិន័យ ៣០លានរៀលទៀតចំពោះករណីមិនបានបូមសំណល់វាវពីស្រះស្តុកទៅធ្វើការសម្អាតឱ្យអស់ទៅតាមការតម្រូវរបស់ក្រសួងបរិស្ថាន និងពិន័យ ៣០លានរៀលបន្ថែមទៀត ករណីដំណើរការអាជីវកម្មដោយពុំទាន់មានការឯកភាពលើរបាយការវាយតម្លៃហេតុប៉ះពាល់បរិស្ថាន និងសង្គម។ ក្រុមហ៊ុនត្រូវមកបង់ប្រាក់ពិន័យនៅច្រកចេញតែមួយនៃក្រសួងបរិស្ថានឱ្យបានមុនថ្ងៃទី២០ ខែកញ្ញា ឆ្នាំ២០២៣។

ក្រសួងបរិស្ថានបានសង្កត់ធ្ងន់ថា ករណីក្រុមហ៊ុនល្មើសនឹងចំណុចណាមួយខាងលើ ក្រសួងបរិស្ថាននឹងចាត់វិធានការតាមផ្លូវតុលាការ និងច្បាប់ជាធរមាន។

បើតាមការបញ្ជាក់ពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនាវានុវត្តន៍ ក្រុមហ៊ុននេះធ្លាប់បានបង្ហូរសំណល់រាវបំពុលបរិស្ថាន និងជីវៈចម្រុះក្នុងទឹកស្ទឹងសង្កែចំនួន៣លើកមកហើយ ដោយគិតទាំងលើកនេះទៀត។

សូមរំលឹកថា កាលពីថ្ងៃទី០២ ខែសីហា ឆ្នាំ២០២៣ មានត្រីមួយចំនួនពុលងាប់អណ្តែតនៅលើទឹកស្ទឹងសង្កែដោយសារតែក្រុមហ៊ុនខាងលើនេះបានបង្ហូរសំណល់រាវម្យ៉ាងចូលក្នុងទឹកស្ទឹងសង្កែដែលមាន ទីតាំងស្ថិតនៅភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង៕