បាត់ដំបង៖ រដ្ឋបាលខេត្តបាត់ដំបងបានចេញសេចក្តីបំភ្លឺថា ករណីត្រីពុលងាប់នៅក្នុងទឹកស្ទឹងសង្កែកាលពីថ្ងៃទី០២ ខែសីហា ឆ្នាំ២០២៣ គឺបណ្តាលមកពីមានសំណល់រាវម្យ៉ាងរបស់រោងចក្រមួយកន្លែងហូរចូលក្នុងទឹកស្ទឹងសង្កែមានពណ៌ខ្មៅដែលមានទីតាំងស្ថិតនៅភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង។

រដ្ឋបាលខេត្តបាត់ដំបង បានបញ្ជាក់ថា ខាងខេត្តបានណែនាំឱ្យមន្ត្រីបច្ចេកទេសរដ្ឋាករ ទឹកបាត់ដំបង នៃមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្ត ធ្វើការពិនិត្យ និងបានរកឃើញថា ទឹកនៅតែរក្សាបានគុណភាពល្អជាធម្មតាអនុលោមតាមស្ដង់ដារគុណភាពទឹកស្អាត និងមិនមានផល ប៉ះពាល់ដល់សុខភាពឡើយ ហើយបច្ចុប្បន្នទឹកស្ទឹងសង្កែបានវិលត្រឡប់មកសភាពដើមជាធម្មតា។

ទន្ទឹមនេះរដ្ឋបាលខេត្តបានចាត់វិធានការចំពោះក្រុមហ៊ុន ដោយបានធ្វើកិច្ចសន្យា និងមិនអនុញ្ញាតឱ្យមានការហូរចេញ នូវសំណល់រាវ (ទឹកកខ្វក់) សំណល់រឹង និងសារធាតុពុល ឬសារធាតុគីមីគ្រប់ប្រភេទ ចេញពីទីតាំងរោងចក ចូលទៅក្នុងទឹកស្ទឹងសង្កែ សារជាថ្មីម្តងទៀតទេ។ បើករណីនេះនៅតែបន្តកើតមានឡើង ក្រុមហ៊ុនត្រូវទទួល ខុសត្រូវទាំងស្រុងចំពោះមុខច្បាប់។

ចំពោះមុខ រដ្ឋបាលខេត្ត បានស្នើសុំកិច្ចអន្តរាគមន៍បន្ថែមទៀតពី ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីមានវិធានការណ៍ផ្លាករោងចក្រ មិនឱ្យដំណើរការជាបណ្តោះអាសន្ន និងស្នើសុំ ទៅក្រសួងបរិស្ថាន និងក្រសួងពាក់ព័ន្ធ ដើម្បីពិនិត្យ និងវាយតម្លៃផលប៉ះពាល់បរិស្ថានសារឡើងវិញ ជៀសវាងបង្កឱ្យមានផលប៉ះពាល់ដល់សុខភាពបងប្អូនប្រជាពលរដ្ឋនៅពេលក្រោយទៀត៕