មណ្ឌលគីរី៖ ស្នងការដ្ឋាននគរបាលខេត្តមណ្ឌលគិរីបានជូនដំណឹងដល់ប្រជាពលរដ្ឋ និងភ្ញៀវទេសចរណ៍ក្ដី អ្នកធ្វើដំណើរតាមរថយន្តក្ដី ទោចក្រយានយន្តក្តី ត្រូវផ្អាកការធ្វើដំណើរជាបណ្ដោះអាសន្ន ចំណុចអូរងើយ ភូមិអណ្ដូងក្រឡឹង សង្កាត់សែនមនោរម្យ ស្រុកអូររាំង ខេត្តមណ្ឌលគិរី ដោយសារភ្លៀងធ្វើឱ្យបាក់ដីនៅចំណុចនោះទាំងស្រុង។

ស្នងការដ្ឋាននគរបាលខេត្តមណ្ឌលគិរី នៅយប់ថ្ងៃទី១ ខែសីហា ឆ្នាំ២០២៣ បានជូនដំណឹងដល់ប្រជាពលរដ្ឋ ទាំងអស់ដែលធ្វើដំណើរលើដងផ្លូវជាតិ (លេខ ៧៦.A) ពីខេត្តមណ្ឌលគិរី ទៅទីក្រុងភ្នំពេញ ឬពីទីក្រុងភ្នំពេញ ទៅ ខេត្តមណ្ឌលគិរី សូមបើកបរផ្លូវវៀង ទៅតាមខេត្តក្រចេះ និងខេត្តរតនៈគិរី ដោយសារនៅ ចន្លោះគីឡូម៉ែត្រលេខ៩១ ដល់គីឡូម៉ែត្រលេខ៩៩ ចំណុចអូរងើយ ភូមិអណ្ដូងក្រឡឹង សង្កាត់សែនមនោរម្យ ស្រុកអូររាំង ខេត្តមណ្ឌលគិរី ផ្លូវនៅចំណុចនេះបាន បាក់ស្រុតចុះប្រវែងបណ្ដោយ ប្រមាណជាជាង ១០ម៉ែត្រ។

តាមរយៈវីដេអូជូនដំណឹងស្នងការដ្ឋាននគរបាលខេត្តមណ្ឌលគីរីឱ្យដឹងថា៖ «អ្នកធ្វើដំណើរពីខេត្តនានាចូលមកតាមផ្លូវជាតិលេខ៧៦ មកដល់ស្រុកអូរាំងគឺផ្លូវជាតិលេខ៧៦ បានដាច់ទាំងស្រុង ការធ្វើដំណើរទាំងរថយន្តតូចនិងធំ មិនធ្វើដំណើរបានទេចាប់ពីម៉ោងនេះតទៅ»។

គួរឱ្យដឹងដែរថា ផ្លូវខាងលើនេះត្រូវបានកាត់ផ្តាច់ និងខូចទាំងស្រុង មិនអាចធ្វើដំណើរបានសម្រាប់មធ្យោបាយយានយន្តគ្រប់ប្រភេទ ដោយសារជំនន់ទឹកភ្លៀងបានកាត់ផ្តាច់ផ្លូវ។ ដូចនេះត្រូវផ្អាកការធ្វើចរាចរជាបណ្តោះអាសន្ន ចាប់ពីថ្ងៃទី១ ខែសីហា ឆ្នាំ២០២៣ រហូតដល់មានការជូនដំណឹងស្តីពីការបើកឱ្យធ្វើចរាចរឡើងវិញ៕