ភ្នំពេញ៖ បុរស ២នាក់ ដោយម្នាក់ជាអ្នកដឹកនាំ និងម្នាក់ទៀតជាអ្នកថតរឿងអប់រំបែបឈាមច្រមុះ ដែលមានភាពសិចស៊ី អាសអាភាស ផ្សព្វផ្សាយតាមបណ្តោញសង្គម ត្រូវបានសមត្ថកិច្ចឃាត់ខ្លួនបញ្ជូនទៅកាន់សាលាដំបូងរាជធានីភ្នំពេញនៅថ្ងៃទី២៧ ខែកក្កដា ឆ្នាំ២០២៣ ដើម្បីចាត់ការតាមនីតិវិធីច្បាប់។

លោក ឈួន សុខលីម ម្ចាស់ហ្វេសប៊ុកផេកឈ្មោះ Life film បានដឹកនាំរឿងអប់រំបែបអាសអាភាស ដោយមានក្រុមការងារថតដោយ សេក ដារ័ត្ន ហៅខេនឌី ផ្សាយក្នុងបណ្តោញសង្គមហ្វេសប៊ុកដើម្បីឱ្យមានភាពល្បីល្បាញ និងរកចំណូលពីហ្វេសប៊ុក។

បុរស ២នាក់នេះ ត្រូវបានឃាត់ខ្លួនក្រោយពីមានពាក្យបណ្តឹងពីតួសម្តែងស្រីថាលោក ឈួន សុខលីម បានណែនាំឱ្យពួកគេដោះអាវ និងស្លៀកខោខ្លី ហើយឱ្យតួប្រុសមកអោបថើប និងស្ទាបរាយកាយរបស់តួស្រី។ តួសម្តែងទាំងនោះបានទារឱ្យលោក ឈួន សុខលីម សងជំងឺចិត្តដល់ពួកគេផងដែរ។

នាយកដ្ឋានប្រឆាំងការជួញដូរមនុស្ស និងការពារអនីតិជន បានបញ្ជាក់ថា ពួកគេទាំង២ត្រូវបានឃាត់ខ្លួនពីបទលួងលោមអូសទាញឲ្យថតសម្តែងរឿងស្រើបស្រាល ប្រទូស្តកេរ្ត៍ភេទ និងចែកចាយរូបភាពអាសអាភាស ព្រមទាំងបង្ហោះជាសាធារណៈ។

បច្ចុប្បន្នជនសង្ស័យទាំងពីរនាក់ត្រូវបានកម្លាំងនគរបាលជំនាញនាយកដ្ឋានកសាងសំណុំរឿងបញ្ជូនទៅអយ្យការសាលាដំបូងរាជធានីភ្នំពេញដើម្បីចាត់ការតាមនីតិវិធីច្បាប់។

សូមរំលឹកថា ក្រសួងវប្បធម៌ និងវិចិត្រសិល្បៈ កាលពីខែមិថុនា ឆ្នាំ២០២៣ បានណែនាំឱ្យអ្នកផលិតវីដេអូ អ្នកបង្កើតមាតិកាកម្សាន្ត ព្រមទាំងអ្នកសម្ដែងក្រៅប្រព័ន្ធតាមបណ្តាញសង្គមទាំងអស់ បញ្ឈប់ជាបន្ទាន់នូវការសម្តែង ការផលិត ការផ្សព្វផ្សាយ ឬចែកចាយ នូវវីដេអូដែលបង្ហាញពីរូបភាពអាសអាភាស ស្រើបស្រាល ហិង្សា និងអសីលធម៌។

ក្រសួងវប្បធម៌បានព្រមានថា ក្រសួងនឹងចាត់វិធានការចំពោះក្រុមអ្នកផលិតវីដេអូបែបអសីលធម៌ដែលប៉ះពាល់ដ៏តម្លៃស្ត្រីខ្មែរ និងកុមារ៕