បន្ទាយមានជ័យ៖ ដំណើរការនៃការបោះឆ្នោតជ្រើសតាំងតំណាងរាស្រ្ត នីតិកាល៧ ឆ្នាំ២០២៣ នៅក្នុងខេត្តបន្ទាយមានជ័យ នាព្រឹកថ្ងៃទី២៣ ខែកក្កដា ឆ្នាំ២០២៣ នេះប្រព្រឹត្តទៅដោយរលូន មិនមានបាតុភាពបង្កនូវអសន្តិសុខណាមួយកើតឡើងឡើយ។

ភ្នាក់ងារសារព័ត៌មាន EAC ប្រចាំនៅខេត្តបន្ទាយមានជ័យ កត់សម្គាល់ឃើញថា ដំណើរការបោះឆ្នោតនៅខេត្តបន្ទាយមានជ័យបានប្រព្រឹត្តទៅយ៉ាងរលូន មិនមានបាតុភាពបង្កនូវអសន្តិសុខណាមួយកើតមានឡើយ។ គ្រប់ការិយាល័យបោះឆ្នោត ដោយមានការការពារសន្តិសុខ សណ្តាប់ធ្នាប់យ៉ាងល្អប្រប្រសើរ។ ដោយឡែកនៅក្នុងការិយាល័យបោះឆ្នោតទៀតសោតក៏មានភ្នាក់សង្កេតការជាតិ អន្តរជាតិ អ្នកសង្កេតការណ៍មកពីគណបក្សនយោបាយ ចំនួន ១១គណបក្ស បានចូលរួមសង្កេតការណ៍ផងដែរ។

យោងតាមរបាយការដែលអង្គភាព EAC News ប្រចាំខេត្តបន្ទាយមានជ័យ ទទួលបានពីគណៈកម្មការជាតិរៀបចំការបោះឆ្នោត (គ.ជ.ប) ខេត្តបន្ទាយមានជ័យ បានឱ្យដឹងថា នៅទូទាំងខេត្តមាន ៩ក្រុង-ស្រុក មាន ៦៧ឃុំ-សង្កាត់ មានការិយាល័យបោះឆ្នោតសរុបមានចំនួន ១ ១១៩ការិយាល័យ។

ពលរដ្ឋមានឈ្មោះក្នុងបញ្ជីបោះឆ្នោតឆ្នាំ២០២២ សរុបចំនួន ៤៣១ ៧៧៥នាក់។ ដោយឡែកគណបក្សនយោបាយដែលបានចូលរួមប្រកួតប្រជែងនៅក្នុងខេត្តបន្ទាយមានជ័យមានចំនួន ១១គណបក្សនយោបាយ ក្នុងចំណោមគណបក្សនយោបាយទាំង ១៨គណបក្សនយោបាយនៅទូទាំងប្រទេសកម្ពុជា៕