កំពង់ស្ពឺ៖ អធិការដ្ឋាននគរបាលស្រុកគងពិសី បានប្រាប់ដល់ម្ចាស់គណនីហ្វេសប៊ុកឈ្មោះ «ប្រូ ភុត» បញ្ឈប់បង្ហោះព័ត៌មានមិនពិតតទៅទៀតទៅ ខណៈអាជ្ញាធរកំពុងស្រាវជ្រាវលើម្ចាស់គណនីហ្វេសប៊ុកខាងលើដើម្បីចាត់ការតាមនីតិវិធី។

គណនីហ្វេសប៊ុកឈ្មោះ «ប្រូ ភុត» កាលពីថ្មីៗនេះបានបង្ហោះព័ត៌មានថាមានបុរសម្នាក់នៅស្រុកគងពិសី ខេត្តកំពង់ស្ពឺ បានទៅផ្សំថ្នាំឈឺជើង រួចក៏លេបថ្នាំ បែកពពុះមាត់ស្លាប់ភ្លាមៗតែម្តងកាលពីថ្ងៃទី១៧ ខែកក្កដា ឆ្នាំ២០២៣។

ជុំវិញករណីនេះ អធិការដ្ឋាននគរបាលស្រុកគងពិសីបកស្រាយថា ព័ត៌មាននេះជាព័ត៌មានប្រឌិតដោយម្ចាស់គណនីខាងលើនេះ ខណៈករណីនេះបានកើតឡើងតាំងពីថ្ងៃទី២៦ ខែមេសា ឆ្នាំ២០២០ មកម្ល៉េះ ហើយមូលហេតុនៃការស្លាប់របស់បុរសនោះក៏មិនមែនស្លាប់ដោយសារតែពុលថ្នាំបែកពពុះមាត់នោះទេដោយករណីនេះក៏បានបញ្ចប់ដោយមានការពិនិត្យ កោសល្យវិច្ច័យយ៉ាងត្រឹមត្រូវតាមគោលការណ៍សុខាភិបាល។

អធិការដ្ឋាននគរបាលស្រុកគងពិសី បានសរសេរនៅក្នុងគណនីខ្លួនដូច្នេះថា៖ «អធិការដ្ឋាននគរបាលស្រុកគងពិសី សូមបញ្ជាក់ ថាព័ត៌មាន នេះមិនមែន កើតហេតុថៃ្ងទី១៧ ខែកក្កដា ឆ្នាំ២០២៣ នេះទេ ករណីនេះកើតកាលពីថៃ្ងទី ២៦ ខែមេសា ឆ្នាំ២០២០ ក្រោយមានរឿងហេតុនេះ ក្រុមគ្រូពេទ្យមន្ទីរសុខាភិបាលខេត្ត អាជ្ញាធរស្រុកគងពិសី ព្រមទាំងក្រុមគ្រួសារ បានសហការចុះពិនិត្យ គឺមិនមែនស្លាប់ដោយសារតែការ លេបថ្នាំពេទ្យខុសនោះទេ ហើយករណីនេះ គឺបានបញ្ចប់ដោយមានការ ពិនិត្យ កោសល្យវិច្ច័យយ៉ាងត្រឹមត្រូវតាមគោលការណ៍សុខាភិបាល»។

អធិការដ្ឋាននគរបាលស្រុកគងពិសី បានស្នើម្ចាស់គណនីហ្វេសប៊ុកឈ្មោះ ប្រូ ភុត បញ្ឈប់យកព័ត៌មានមិនពិតមកផ្សព្វផ្សាយតទៅទៀតក្នុងចេតនាបង្កការចលាចលក្នុងសង្គម ខណៈករណីនេះជំនាញ និងបន្ដស្រាវជ្រាវលើម្ចាស់គណនីហ្វេសប៊ុកខាងលើដើម្បីចំណាត់ការនីតិវិធីបន្ដ៕