ភ្នំពេញ៖ ក្រសួងសង្គមកិច្ច អតីតយុទ្ធជន និងយុវនីតិសម្បទា បានចេញសេចក្តីជូនដំណឹងជាសាធារណៈ ការប្រកាសស្វែងរកឪពុកម្តាយចិញ្ចឹមក្នុងប្រទេស ឬ អ្នកអាណាព្យាបាលស្របច្បាប់សម្រាប់អនីតិជន។

សេចក្តីជូនដំណឹងរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃទី១៨ ខែកក្កដា ឆ្នាំ២០២៣ បានជូនដំណឹងជាសាធារណៈ ចំពោះសាធារណជនដែលមានសញ្ញាតិខ្មែរ និងមានទីលំនៅអចិន្ត្រៃយ៍នៅក្នុងកម្ពុជាឱ្យដឹងថា ក្រសួងមានកុមារ ចំនួន ៨នាក់ ក្នុងនោះកុមារពិការ ចំនួន ៤នាក់ និងកុមារស្ថានភាពធម្មតា ចំនួន ៤នាក់ កំពុងរស់នៅក្នុងមជ្ឈមណ្ឌលទារក និងកុមារជាតិ និងមណ្ឌលបុរីទី១ ក្នុងខេត្តបាត់ដំបង ដែលស្ថិតក្រោមការ គ្រប់គ្រងរបស់ក្រសួង។

ក្នុងករណីសាធារណជនមានចំណាប់អារម្មណ៍ និងមានបំណងចង់សុំកូនចិញ្ចឹមក្នុងប្រទេស ក៏ដូចជាចង់ផ្សារភ្ជាប់មនោសញ្ចេតនាជាគ្រួសារចិញ្ចឹម ដោយទឹកចិត្តសប្បុរសធម៌ និងក្តីអាណិតស្រលាញ់ចំពោះកុមារកំព្រាណាម្នាក់ ឬធ្វើជាអ្នកអាណាព្យាបាលស្រប ច្បាប់ក្នុងប្រទេសចំពោះកុមារកំព្រា ទាំង ៨នាក់នេះ ទំនាក់ទំនងដាក់ពាក្យ ស្នើសុំមកនាយកដ្ឋាន កិច្ចការពារកុមារ នៃក្រសួងសង្គមកិច្ច អតីតយុទ្ធជន និងយុវនីតិសម្បទា ដែលមានអាសយដ្ឋានអគារលេខ៧៨៨ មហាវិថីព្រះមុនីវង្ស រាជធានីភ្នំពេញ ឬ ទំនាក់ទំនងតាមលេខទូរស័ព្ទលេខ ០១៥ ៩៧៣ ៥៣៦៕