ភ្នំពេញ៖ ការឃោសនាបោះឆ្នោតក្នុងរយៈពេល ១៦ថ្ងៃកន្លងមកនេះប្រព្រឹត្តិទៅដោយរលូន មានសុវត្ថិភាព សណ្តាប់ធ្នាប់ល្អ និងគ្មានអំពើហិង្សាកើតឡើងគូរជាទីកត់សម្គាល់ឡើយ។

គណបក្សមួយចំនួនបានហែក្បូនឃោសនារកសំឡេងឆ្នោតនៅតាមមណ្ឌលរាជធានីភ្នំពេញ និងតាមបណ្តាខេត្ត។ គណបក្សមួយចំនួនទៀត ចាក់មេក្រូផ្សព្វផ្សាយនៅទីស្នាក់ការគណបក្ស និងចល័តតាមភូមិ ចែកខិត្តបណ្ណតាមខ្នងផ្ទះ បិទខិត្តបណ្ណ និងចងបដានៅតាមទីសាធារណៈ ប្រគំតន្ត្រី សម្ដែងសិល្បៈ ចាក់បញ្ចាំងស្លាយ (Slide) វីដេអូ នៅតាមមណ្ឌលបោះឆ្នោតដែលខ្លួនឈរឈ្មោះ។

ដំណើរការឃោសនាបោះឆ្នោតរបស់គណបក្សនយោបាយចំនួន ១៦ថ្ងៃកន្លងទៅនេះបានប្រព្រឹត្តទៅដោយរលូន មានសន្តិសុខ សុវត្ថិភាព សណ្ឋាប់ធ្នាប់ល្អ និងគ្មានអំពើហិង្សា។ ការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ មានរយៈពេល ២១ថ្ងៃ ចាប់ពីថ្ងៃទី១ ដល់ថ្ងៃទី២១ ខែកក្កដា ឆ្នាំ២០២៣ ហើយនៅថ្ងៃទី២៣ ខែកក្កដា ជាថ្ងៃបោះឆ្នោតជ្រើសតាំងតំណាងរាស្ត្រនីតិកាលទី៧។

មុនមួយថ្ងៃបោះឆ្នោត និងចំថ្ងៃបោះឆ្នោត ទី២២-២៣ ខែកក្កដា ឆ្នាំ២០២៣ គណៈកម្មាធិការជាតិរៀបចំការបោះឆ្នោត (គ.ជ.ប) រាជរដ្ឋាភិបាលហាមពលរដ្ឋ ជាពិសេសអាជីវករទាំងអស់ ត្រូវផ្អាកផឹក និងលក់គ្រឿងស្រវឹងមួយថ្ងៃមុនថ្ងៃបោះឆ្នោត និងថ្ងៃបោះឆ្នោត ដើម្បីរួមចំណែកទប់ស្កាត់អំពើហិង្សា ការគំរាមកំហែង ការបំភិតបំភ័យ គ្រោះថ្នាក់ចរាចរណ៍ គ្រោះថ្នាក់សង្គម និងបាតុភាពនានាដែលអាចបណ្តាលមកពីការពិសាគ្រឿងស្រវឹងគ្រប់ប្រភេទ។

ការហាមមិនឱ្យពលរដ្ឋ និងអាជីវករលក់ និងផឹកគ្រឿងស្រវឹងអំឡុងពេលបោះឆ្នោតនេះ គឺរាជរដ្ឋាភិបាលសង្កេតឃើញថាការពិសាគ្រឿងញៀនអាចបង្កឱ្យមានអំពើហិង្សា គ្រោះថ្នាក់ចរាចរណ៍ គ្រោះថ្នាក់សង្គម បទល្មើសផ្សេងៗ ដែលអាចឱ្យបាត់សណ្តាប់ធ្នាប់សាធារណៈ៕