ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន នាព្រឹកថ្ងៃនេះបានសរសេរសារបន្ថែមពីការលើកឡើងទាក់ទងនឹងលោក Pita កាលពីយប់មិញដែលមានប្រជាជនថៃជាច្រើនបានចូលមកបញ្ចេញមតិ (Comment)។

នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានលើកឡើងថា លោក Pita មិនបានជាប់ឆ្នោតជានាយករដ្ឋមន្ត្រីថៃថ្មី គឺជាការបរាជ័យមួយរបស់ក្រុមប្រឆាំងជ្រុលនិយមនៃកម្ពុជាដែលចង់ពឹងទឹកដីថៃដើម្បីបោះបោរប្រឆាំងរាជរដ្ឋាភិបាលកម្ពុជា។

សម្តេចតេជោថ្លែងថា អ្នកវិភាគតាមវិទ្យុបរទេសនិយាយជាភាសាខ្មែរ បានវិភាគថា ក្រុមប្រឆាំងជ្រុលនិយមមានក្តីសង្ឃឹមថានឹងអាចប្រើប្រាស់ទឹកដៃថៃដើម្បីចូលមកធ្វើចលនាបោះបោរនៅកម្ពុជា តាមរយៈលោក Pita ដែលជាបេក្ខភាពនាំមុខគេដើម្បីក្លាយជានាយករដ្ឋមន្ត្រីថៃថ្មី។

សម្តេចតេជោ បានប្រាប់ដល់ក្រុមប្រឆាំងជ្រុលនិយម កុំធ្វើនយោបាយពឹងដង្ហើមរស់ដោយសារអ្នកដទៃ ដើម្បីបំផ្លាញជាតិខ្លួនឯង ហើយឈប់ប្រើឈ្មោះលោក Pita ទាំងដែលខ្លួនលោកមិនដឹងខ្លួនផងឲ្យមកប្រឆាំងជាមួយកម្ពុជា។

សម្តេចនាយករដ្ឋមន្ត្រីបានអះអាងថា សម្តេចគោរពការសម្រេចរបស់ប្រជាជនថៃ និង មិនជ្រៀតជ្រេកកិច្ចការផ្ទៃក្នុងប្រទេសថៃនោះឡើយ ហើយនឹងត្រៀមខ្លួនធ្វើការជាមួយថ្នាក់ដឹកនាំរដ្ឋាភិបាលថៃដោយមិនប្រកាន់ថាមកពីបក្សនយោបាយណាឡើយ។

សម្តេចតេជោមានប្រសាសន៍ដូច្នេះថា៖«ខ្ញុំមិនបានប្រឆាំងលោក Pita នោះទេ ហើយក៏មិនជ្រៀតជ្រែកកិច្ចការផ្ទៃក្នុងប្រទេសថៃនោះដែរ។ ការដែលខ្ញុំចេញសារនេះមានបំណងប្រាប់ទៅក្រុមជ្រុលនិយមនៅកម្ពុជាថា បំណងរបស់ពួកអ្នកត្រូវរលាយដូចអំបិលត្រូវទឹក»៕