ភ្នំពេញ៖ ក្រោយមានការលើកឡើងផ្សេងៗគ្នាជុំវិញទឹកដីសម្រាប់ការប្រកួតជម្រុះ Play-Off ពាន AFC Asian Cup រវាងក្រុមជម្រើសជាតិកម្ពុជា និងក្រុមជម្រើសកោះហ្គាំ នៅពេលនេះសហព័ន្ធកីឡាបាល់់ទាត់កម្ពុជា បានបញ្ជាក់ពីទីតាំងផ្លូវការសម្រាប់ការប្រកួតហើយ ពោលគឺសហព័ន្ធបាល់ទាត់ទ្វីបអាស៊ី (AFC) បានអនុញ្ញាតឱ្យការប្រកួតទាំងពីរជើង ធ្វើឡើងនៅទឹកដីកណ្តាលក្នុងប្រទេសបារ៉ែន។
គួរបញ្ជាក់ផងដែរថា តាមកាលវិភាគដែលបានគ្រោងទុក ការប្រកួតជម្រុះ Play Off រវាងកម្ពុជា និងកោះហ្គាំ ត្រូវធ្វើឡើងពីរជើង ពោលគឺជើងទី១ កោះហ្គាំ និងត្រូវទទួលជាម្ចាស់ផ្ទះនៅថ្ងៃទី០៧ ខែកញ្ញា មុននឹងកម្ពុជាទទួលស្វាគមន៍ជើងទី២ នៅថ្ងៃទី១២ ខែតុលាវិញម្តង។ ប៉ុន្តែយ៉ាងណាក្តី ស្របពេលពិភពលោកកំពុងមានវិបត្តិ និងការព្រួយបារម្ភលើការរាតត្បាតកូវីដ-១៩ ជាពិសេសវីរុសដែលតា ទាំងកម្ពុជា និងកោះហ្គាំក៏បានស្នើឱ្យមានការប្រកួតនៅទឹកដីកណ្តាលណាមួយទាំងពីរជើងតែម្តង ដើម្បីស្វែងរកក្រុមឡើងទៅកាន់វគ្គបន្ត។
សម្រាប់កាលវិភាគថ្មីសម្រាប់ការប្រកួតនៅប្រទេសបារ៉ែនក្នុងជេីងទីមួយនឹងធ្វើឡើងនៅថ្ងៃទី០៩ ខែតុលា ឆ្នាំ២០២១ និងជើងទីពីរនៅថ្ងៃទី១២ ខែតុលា ឆ្នាំ២០២១។
គួរបញ្ជាក់ថា កម្ពុជា ទើបបញ្ចប់បេសកកម្មប្រកួតបាល់ទាត់នៅប្រទេសបារ៉ែនកាលពីពេលថ្មីៗនេះ ដោយប្រកួតទល់នឹងក្រុមខ្លាំងៗរួមមាន អ៊ីរ៉ាក់, អ៊ីរ៉ង់ និងម្ចាស់ផ្ទះបារ៉ែនផ្ទាល់តែម្តង។ ក្រោយទទួលបានការអនុញ្ញាតនេះ សហព័ន្ធកីឡាបាល់់ទាត់កម្ពុជាក៏បានឆ្លៀតឱកាសថ្លែងអំណរគុណប្រទេសបារ៉ែនសាជាថ្មី ដែលស្ម័គ្រចិត្តទទួលរៀបចំការប្រកួតនេះតាមការស្នើសុំពី AFC៕
