ភ្នំពេញ៖ សមាជិកសភាវ័យក្មេងលោក ហ៊ុន ម៉ានី បានលើកឡើងថាសន្ដិភាពនៅកម្ពុជាបានធ្វើឱ្យមរតកវប្បធម៌ដ៏ច្រើនអនេករបស់កម្ពុជាដែលស្ទើរតែបាត់បង់ បានរស់រានមានជីវិតឡើងវិញ និងកំពុងត្រូវបានលើកស្ទួយឈានទៅក្លាយជាបេតិកភណ្ឌពិភពលោក និងមនុស្សជាតិផងដែរ។

លោក ហ៊ុន ម៉ានី បានសរសេរនៅហ្វេសបុកផេករបស់លោកក្នុងថ្ងៃទី៧ ខែកក្កដា ឆ្នាំ២០២៣ ចំខួប ១៥ឆ្នាំនៃការដាក់បញ្ចូលប្រាសាទព្រះវិហារជាសម្បត្តិបេតិកភណ្ឌពិភពលោក ដោយបានអបអរសាទរចំពោះការដាក់បញ្ចូលប្រាសាទដ៏អស្ចារ្យរបស់ខ្មែរនេះ និងថាទាំងនេះគឺបានសម្រេចតាមរយៈកិច្ចខិតខំប្រឹងប្រែងដ៏មោះមុតស្វិតស្វាញរបស់រាជរដ្ឋាភិបាល។

លោកបានបន្ថែមថាក្រោមម្លប់នៃសុខសន្តិភាពមរតកវប្បធម៌ច្រើនអនេកដែលស្ទើរតែបាត់បង់ក្នុងសម័យសង្រ្គាម បានរស់រានមានជីវិតឡើងវិញ និងកំពុងត្រូវបានលើកស្ទួយ ឈានទៅដល់ក្លាយជាបេតិកភណ្ឌពិភពលោក និងមនុស្សជាតិ។

លោកថា៖ «ថែរក្សាការពារសន្តិភាព ប្រៀបបីដូចយើងបានថែរក្សាការពារសម្បត្តិវប្បធម៌ដូនតាដូច្នេះដែរ»។

គួរឱ្យដឹងផងដែរថា ប្រាសាទព្រះវិហារត្រូវបានដាក់បញ្ចូលប្រាសាទព្រះវិហារជាសម្បត្តិបេតិកភណ្ឌពិភពលោក នៅថ្ងៃទី៧ ខែកក្កដា ឆ្នាំ២០០៨៕