ភ្នំពេញ៖ ក្រសួងសុខាភិបាលមិនអនុញ្ញាតឱ្យមានការផ្សព្វផ្សាយជាសាធារណៈលក់ផលិតផលជំនួយផ្លូវភេទបុរស និងផលិតផលជំនួយអារម្មណ៍ផ្លូវភេទនារីតាមបណ្តាញសង្គមឡើយ។ ដូច្នេះក្រសួងសុខាភិបាលស្នើក្រសួងប្រៃសណីយ៍ និងទូរគមនាគមន៍ឱ្យទប់ស្កាត់ការផ្សព្វផ្សាយផលិតផលទាំងនេះតាមប្រព័ន្ធអនឡាញ។

រដ្ឋមន្ត្រីក្រសួងសុខាភិបាល ម៉ម ប៊ុនហេង  សង្កេតឃើញថា បច្ចុប្បន្ននេះមានការផ្សព្វផ្សាយលក់ផលិតផលទាំងនេះច្រើនតាមប្រព័ន្ធអនឡាញដូចជា ហ្វេសប៊ុក tiktok telegram Instagram YouTube Website ជាដើម ខណៈក្រសួងមានការលំបាកក្នុងការស្វែងរកជនល្មើសដើម្បីមកផ្តន្ទាទោសតាមច្បាប់។

លោក ម៉ម ប៊ុនហេង បានថ្លែងទៅកាន់រដ្ឋមន្ត្រីក្រសួងប្រៃសណីយ៍ ជួយសហការទប់ស្កាត់បញ្ឈប់ការផ្សព្វផ្សាយលក់ផលិតផលទាំងនេះ ដើម្បីបង្ការកុំឱ្យកើតមានគ្រោះថ្នាក់ពីការប្រើប្រាស់ផលិតផលទាំងនេះ និងបង្ការមិនឱ្យមានបទល្មើសឧក្រិដ្ឋជាយថាហេតុផ្សេងៗ។

រដ្ឋមន្ត្រីក្រសួងសុខាភិបាលបានបញ្ជាក់ថា រាល់ឱសថ និងផលិតផលដែលមានគុណភាព មានលេខទិដ្ឋាការ ឬបញ្ជិកាពីក្រសួងសុខាភិបាលត្រឹមត្រូវគឺអាចផ្សព្វផ្សាយលក់តាមគ្រប់រូបភាព លើកលែងតែផលិតផលជំនួយផ្លូវភេទបុរស និងផលិតផលជំនួយអារម្មណ៍ផ្លូវភេទនារី គឺក្រសួងមិនអនុញ្ញាតឱ្យផ្សព្វផ្សាយលក់ជាសាធារណៈឡើយ៕