ព្រះវិហារ៖ បុរសម្នាក់អាយុ ៤២ឆ្នាំ បានដើរជាន់មីនបណ្ដាលឱ្យផ្ទុះដាច់កជើងស្ដាំ ថ្ងៃទី៤ ខែកក្កដា ឆ្នាំ២០២៣ នៅចំណុចភ្នំណងទឹម ក្នុងភូមិឈើទាលគង ឃុំជាំក្សាន្ត ស្រុកជាំក្សាន្ត ខេត្តព្រះវិហារ។

អាជ្ញាធរមីនបានឱ្យដឹងថា ជនរងគ្រោះឈ្មោះ និល ចាន់ ភេទប្រុស អាយុ ៤២ឆ្នាំ មានកូនក្នុងបន្ទុកចំនួន ៧នាក់ ស្រី ៤នាក់រស់នៅភូមិឈើទាលគង ឃុំជាំក្សាន្ត ស្រុកជាំក្សាន្ត ខេត្តព្រះវិហារ បានដើរព្រៃរុករកបន្លែផ្លែឈើជាន់មីនផ្ទុះបណ្តាលឲ្យដាច់កជើងខាងស្តាំ និងត្រូវបានបញ្ជូនទៅព្យាបាលនៅមន្ទីរពេទ្យបង្អែក ១៦មករា ខេត្តព្រះវិហារ។

អាជ្ញាធរមីនបានអំពាវនាវដល់បងប្អូនប្រជាពលរដ្ឋទាំងអស់ សូមកុំចូលទៅតំបន់ណាដែលមិនដឹងប្រវត្តិច្បាស់លាស់ និងត្រូវសាកសួរអាជ្ញាធរមូលដ្ឋានមុនចូលតំបន់នោះ និងសូមកុំប៉ះពាល់នៅពេលឃើញមីន និងគ្រាប់មិនទាន់ផ្ទុះ វាអាចបណ្តាលអោយរបួស ពិការ ស្លាប់គ្រប់ពេល ហើយត្រូវរាយការណ៍ជាបន្ទាន់ដល់អាជ្ញាធរមានសមត្ថកិច្ច និងប្រតិបត្តិករបោសសម្អាតមីនដែលនៅជិតទីនោះដើម្បីយកគ្រាប់ទាំងនោះទៅកំទេចចោល៕