ភ្នំពេញ៖ កម្ពុជាបានសម្រេចហាមឃាត់សមាជិកក្រុមប្រឹក្សាភិបាលត្រួតពិនិត្យនៃក្រុមហ៊ុន META ២២នាក់មិនឱ្យចូលប្រទេសកម្ដុជា ដោយថាអនុសាសន៍របស់ពួកគេក្នុងការផ្អាកជាបណ្ដោះអាសន្នចំពោះគណនី FACEBOOK ផ្លូវការរបស់នាយករដ្ឋមន្ត្រីកម្ពុជាគឺមានលក្ខណៈនយោបាយ។

ក្នុងសេចក្ដីថ្លែងការណ៍ចុះថ្ងៃទី៤ ខែកក្កដា ឆ្នាំ២០២៣ ក្រសួងការបរទេសបានរាយនាមអ្នកទាំង ២២នាក់នោះរួមមាន Kenji Yoshino, Julie Owono, Pamela San Martin, Ronaldo Lemos, Michael McConnell, Nighat Dad, Katherine Chen, Andras Sajo, Emi Palmor, John Samples, Khaled Mansour, Suzanne Nossel, Tawakkol Karman, Catal ina Botero-Marino, Afia Asantewaa Asare-Kyei, Nicolas Suzor, Paolo Carozza, Evelyn Aswad, Sudhir Krishnaswamy, Hel le Thorn ing-Schmidt, Alan Rusbridger និង Endy Bayuni។

ក្រសួងការបរទេសបានបញ្ជាក់ថាតាមសេចក្ដីប្រកាសដែលបានបង្ហោះលើប្រព័ន្ធទំនាក់ទំនងសង្គមហ្វេសបុកផងដែរនោះថា៖ «បុគ្គលដូចមានរាយនាមខាងលើត្រូងបានហាមឃាត់មិនឱ្យចូល ឬមានវត្តមាននៅក្នុងព្រះរាជាណាចក្រកម្ពុជា។ ពួកគេត្រូវចាកចេញពីទឹកដីកម្ពុជាក្នុងរយៈពេល ៤៨ម៉ោង គិតចាប់ពីកាលបរិច្ឆេទចេញសេចក្ដីថ្លែងការណ៍នេះនៅម៉ោង១៦ ថ្ងៃទី៤ ខែកក្កដា ឆ្នាំ២០២៣»។

គួរឱ្យដឹងផងដែរថាការសម្រេចហាមឃាត់សមាជិកក្រុមប្រឹក្សាភិបាលត្រួតពិនិត្យនៃក្រុមហ៊ុន META ២២នាក់នេះគឺបន្ទាប់ពីនាយករដ្ឋមន្ត្រីកម្ពុជាបានសម្រេចលុបចោលហ្វេសបុកផេកផ្លូវការរបស់សម្ដេចកាលពីថ្ងៃទី២៩ ខែមិថុនា ឆ្នាំ២០២៣ ជាការឆ្លើយតបនឹងសេចក្ដីសម្រេចរបស់ក្រុមប្រឹក្សាភិបាលនៃក្រុមហ៊ុន META ដែលចង់ព្យួរទំព័រហ្វេសបុករបស់សម្ដេច រយៈពេល ៦ខែ។

ក្រោយពីនាយករដ្ឋមន្ត្រីបានលុបហ្វេសបុកផ្លូវការរបស់សម្ដេច ១ថ្ងៃក្រោយមក ពោលគឺនៅថ្ងៃទី៣០ ខែមិថុនា ក្រសួងប្រៃសណីយ៍និងទូរគមនាគមន៍បានសម្រេចបណ្ដេញតំណាងក្រុមហ៊ុន facebook ចេញពីកម្ពុជាបន្ទាប់ពីពិនិត្យឃើញមានភាពមិនប្រក្រតីមួយចំនួនដូចជា ការបង្កើតគណនីក្លែងបន្លំ ហានិភ័យលើទិន្នន័យឯកជន ការប្រើប្រាស់និងការប្រមូលទិន្នន័យឯកជន ការផ្សព្វផ្សាយព័ត៌មានក្លែងក្លាយ កង្វះគណនេយ្យភាពនិងតម្លាភាព និងការជ្រៀតជ្រែកចូលកិច្ចការនយោបាយរបស់ប្រទេសជាអាទិ៍៕