ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានផ្ញើសាររំលែកទុក្ខដល់គ្រួសារដែលបានបាត់បង់សមាជិកគ្រួសារជាទីស្រឡាញ់ គឺលោកស្រី ម៉ិញ កុសនី ដែលទទួលមរណភាពនៅថ្ងៃទី០៤ ខែកក្កដា ឆ្នាំ២០២៣ ក្នុងជន្មាយុ ៧៧ឆ្នាំដោយរោគាពាធ។
សម្រាប់សម្តេចតេជោ និងសម្តេចកិត្តិព្រឹទ្ធបណ្ឌិត ដំណឹងមរណភាពរបស់លោកស្រី ម៉ិញ កុសនី គឺជាការបាត់បង់ភរិយា ម្ដាយ ជីដូន ជាទីគោរពស្រលាញ់ប្រកបដោយព្រហ្មវិហារធម៌ក្នុងការអប់រំផ្ដល់ដំបូន្មានដល់កូនចៅ និងជា ព្រឹទ្ធាចារ្យសិល្បៈមួយរូបដ៏ល្បីល្បាញលើវិស័យសិល្បៈរបាំបុរាណខ្មែរ ដែលបានបូជាកម្លាំងកាយចិត្ត ប្រាជ្ញាស្មារតី ក្នុងការរួមចំណែកយ៉ាងសកម្មក្នុងការបម្រើវិស័យសិល្បៈវប្បធម៌។
សម្តេចតេជោបានថ្លែងដូច្នេះថា៖ «ទោះបីរូបកាយ របស់លោកជំទាវ បានបាត់បង់ទៅមែនពិត ប៉ុន្តែអំពើជាកុសល កិត្តិយស សេចក្ដីថ្លៃថ្នូរនឹងនៅ ស្ថិតស្ថេរក្នុងសន្តានចិត្ដកូន ចៅ និងញាតិមិត្តជិតឆ្ងាយទាំងអស់ជានិច្ចនិរន្តរ៍»។
សម្តេចតេជោ និងសម្តេចកត្តិព្រឹទ្ធបណ្ឌិត សូមឧទ្ទិសបួងសួងដល់ដួងវិញ្ញាណក្ខន្ធលោកស្រី ម៉ិញ កុសនី សូមឆាប់ បានចាប់កំណើតកើតក្នុងសុគតិភពកុំបីឃ្លៀងឃ្លាតឡើយ។
លោកស្រី ម៉ិញ កុសនី បច្ចុប្បន្នជារដ្ឋលេខាធិការក្រសួងវប្បធម៌ និងវិចិត្រសិល្បៈដែលលោកស្រីកាន់តំណែងនេះតាំងពីឆ្នាំ២០០៨ មកម្ល៉េះ។ លោកស្រី កើតនៅថ្ងៃទី១៩ ខែមករា ឆ្នាំ១៩៤៩ ក្នុងខេត្តកំពង់ធំ។ លោកស្រី ជាអតីតគ្រូបង្ហាត់សិល្បៈការិយាល័យរបាំព្រះរាជទ្រព្យនៅក្នុងព្រះបរមរាជវាំង៕