កំពង់ចាម៖ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក នាយឧត្តមសេនីយ៍ ហ៊ុន ម៉ាណែត តំណាងនាយករដ្ឋមន្ដ្រី និងសម្តេចកិត្តិព្រឹទ្ធបណ្ឌិត ចូលរួមពិធីសម្ពោធដាក់ឱ្យប្រើប្រាស់ផ្លូវការអគារសិក្សា អគារទីចាត់ការ និងបណ្ណាល័យ នៅសាលាបឋមសិក្សាព្រៃទទឹង ឃុំជ្រៃវៀន ស្រុកព្រៃឈរ ខេត្តកំពង់ចាម នៅថ្ងៃទី ទី១២ ខែមិថុនា ឆ្នាំ២០២៣។
លោក ហ៊ុន ម៉ាណែត ថ្លែងថា សមិទ្ធផលជាច្រើន ដែលបានកកើតឡើងនៅក្នុងសាលាបឋមសិក្សាព្រៃទទឹង បានបង្ហាញឱ្យឃើញនូវលទ្ធផលនៃការដាំក្នុងសាលាផ្លែផ្កានៅក្នុងសង្គមក្រោមម្លប់នៃសន្តិភាព ពីព្រោះធនធានមនុស្សដែលធ្លាប់រៀនសូត្រនៅក្នុងសាលានេះ បានរីកដុះដាលទទួលជោគជ័យទាំងក្នុងការសិក្សាកម្រិតឧត្តមសិក្សា និងអាជីពការងារ ហើយបានត្រឡប់មកអភិវឌ្ឍសាលាបឋមសិក្សាដើមកំណើតវិញ សម្រាប់ជាមូលដ្ឋានក្នុងការបន្តបណ្តុះបណ្តាលធនធានមនុស្សថ្មីបន្ថែមទៀត។
លោកបន្តថា សមិទ្ធផលដែលសម្ពោធក្នុងថ្ងៃនេះ គឺសម្រាប់អ្នកព្រៃទទឹងផ្ទាល់ ក៏ដូចជាសម្រាប់បណ្តុះបណ្តាលធនធានមនុស្ស ដែលនឹងត្រូវចូលរួមអភិវឌ្ឍប្រទេសជាតិនៅក្នុងពេលខាងមុខបន្តទៀត។
លោកគូសបញ្ជាក់ថា បច្ចុប្បន្ននេះប្រទេសកម្ពុជាបានរួចផុតពីវិនាសកម្មសង្គ្រាមរ៉ាំរ៉ៃ និងទុក្ខលំបាកវេទនាទាំងឡាយ ខណៈកំពុងស្ថិតនៅលើមាគ៌ាអភិវឌ្ឍន៍រីកចម្រើនទៅមុខ។ លោកបន្តថា ទាំងនេះគឺជាគុណបំណាច់របស់គណបក្សប្រជាជនកម្ពុជា ដែលបានរំដោះប្រទេសឱ្យរួចផុតពីរបបប៉ុលពត និងនាំមកនូវសន្តិភាពពេញលេញ និងឯកភាពទឹកដីតាមរយៈនយោបាយឈ្នះ-ឈ្នះ ដែលអាចប្រសិទ្ធនាមថាបានថាជា «សម័យតេជោសន្តិភាព»។
លោក ហ៊ុន ម៉ាណែត បញ្ជាក់ទៀតថា រាជរដ្ឋាភិបាលនឹងបន្តអភិវឌ្ឍលើគម្រោងសំខាន់ៗចំនួន៣បន្ថែមទៀត គឺគម្រោងទី១ គម្រោងពង្រីកផ្លូវជាតិលេខ ៧, ទី២ គម្រោងស្ពានតភ្ជាប់កំពង់ធំ-កំពង់ឆ្នាំង និងទី៣ គម្រោងជាប្រវត្តិសាស្ត្រតភ្ជាប់ទន្លេទៅសមុទ្រ «ព្រែកជីកហ្វូណនតេជោ»ដែលជាគម្រោងប្រវត្តិសាស្ត្រលើកទី១ ក្នុងវិស័យដឹកជញ្ជូនតាមផ្លូវទឹករបស់កម្ពុជា ដើម្បីកាត់បន្ថយថ្លៃដើមដឹកជញ្ជូនទំនិញ និងទេសចរណ៍ ដោយនឹងផ្តល់ផលប្រយោជន៍យ៉ាងច្រើនសម្រាប់សេដ្ឋកិច្ចជាតិ៕