ភ្នំពេញ៖ លោក ឯម រៀម បានចេញសារសុំទោសនិងលុបរូបភាពរបស់លោកដែលមានលក្ខណៈអាសចេញ ក្រោយក្រុមប្រឹក្សាវិន័យនិងលើកសរសើរនៃអ្នកសិល្បៈនៃក្រសួងវប្បធម៌និងវិចិត្រសិល្បៈព្រមានចាត់វិធានទៅតាមផ្លូវច្បាប់។

សារសុំទោសទទួលកំហុសរបស់លោក ឯម រៀម នៅថ្ងៃទី៩ ខែមិថុនា ឆ្នាំ២០២៣ ថា៖ «សូមគោរពនិងទទួលបាន ហើយខ្ញុំបាទ EM RIEM បានលុបចោលហើយ។ តាមពិតជារូបភាពដែល Edit តាម App ឈ្មោះថា ToonMe ហើយខ្ញុំបាទផុសក្នុង Story FB គ្រាន់តែចង់ចែករំលែកពី App សម្រាប់ Edit រូបភាព before និង after ដែលមានបងប្អូនជាច្រើនចង់បានរាងរបស់គាត់ទៅជាមានសាច់ដុំធំៗ ដោយមិនមានចេតនាអ្វីទេ…»។

ក្នុងសារដដែលនោះ លោក ឯម រៀម បានសូមអភយ័ទោស និងសូមទោសចំពោះកំហុសឆ្គងនៃការចែករំលែករូបភាពនេះ ដែលធ្វើឱ្យប៉ះពាល់ដល់វប្បធម៌ ប្រពៃណី និងសេចក្តីថ្លៃថ្នូររបស់កម្ពុជា។

គួរឱ្យដឹងដែរថា កាលពីថ្ងៃទី៨ ខែមិថុនា ឆ្នាំ២០២៣ ក្រុមប្រឹក្សាវិន័យនិងលើកសរសើរ ពិនិត្យឃើញនៅក្នុងផេករបស់លោក ឯម រៀម បានបង្ហោះជាសាធារណៈរូបភាពរបស់លោក មានលក្ខណៈអាស ដែលបណ្តាលឱ្យប៉ះពាល់ដល់វប្បធម៌ ប្រពៃណី និង សេចក្តីថ្លៃថ្នូររបស់សង្គមជាតិយ៉ាងធ្ងន់ធ្ងរ។

លេខាធិការដ្ឋានក្រុមប្រឹក្សាវិន័យ និងលើកសរសើរនៃអ្នកសិល្បៈ បញ្ជាក់ថា ចំពោះករណីនេះក្រសួងក៏ធ្លាប់បានអញ្ជើញលោកមកណែនាំ អប់រំចំពោះករណីដែលលោកបានបង្ហោះផ្សព្វផ្សាយរូបភាពបែបនេះម្តងរួចហើយ ហេតុនេះ ក្រុមប្រឹក្សាវិន័យ និងលើកសរសើរនៃអ្នកសិល្បៈ តម្រូវអោយលោក ឯម រៀម លុបរូបភាពនោះជាបន្ទាន់ចេញពីគ្រប់បណ្តាញផ្សព្វផ្សាយសង្គម។

ក្រុមប្រឹក្សាវិន័យនិងលើកសរសើរនៃអ្នកសិល្បៈគូសបញ្ជាក់ថា ប្រសិនបើលោក ឯម រៀម មិនអនុវត្តតាមសេចក្តីជូនដំណឹងនេះទេនឹងចាត់វិធានទៅតាមផ្លូវច្បាប់ដែលមានជាធរមាន៕