បាត់ដំបង៖ រយៈពេល៥ខែ ឆ្នាំ២០២៣នេះ ករណីខ្យល់កន្ត្រាក់បានកើតឡើងនៅក្នុងខេត្តបាត់ដំបង បំផ្លាញផ្ទះពលរដ្ឋជាង២ពាន់ខ្នង សម្លាប់មនុស្ស ៦នាក់ និង១១នាក់រងរបួស ហើយសម្លាប់គោជាច្រើនក្បាលផងដែរ។
តាមរបាយការណ៍ពីមន្ត្រីសាខាកាកបាទក្រហមកម្ពុជាខេត្តបាត់ដំបង ដោយសារឥទ្ធិពលអាកាសធាតុប្រែប្រួលជាបន្តបន្ទាប់ពិសេសចាប់ពីដើមខែមករា ដល់ចុងខែឧសភា ឆ្នាំ២០២៣កន្លងមកនេះ គ្រោះធម្មជាតិខ្យល់កន្ត្រាក់ និងរន្ទះបាញ់បានបោកបក់យ៉ាងខ្លាំងរហូតបានបំផ្លាញលំនៅដ្ឋានរបស់ប្រជាពលរដ្ឋធ្ងន់ និងស្រាលសរុបចំនួន ២ ២០៨ខ្នង ស្មើប្រជាពលរដ្ឋរាយប្រមាណ ៩ ៣៩៤នាក់។
ជាមួយគ្នានេះគ្រោះធម្មជាតិនេះក៏បានបង្កជារន្ទះបាញ់សម្លាប់ជីវិតមនុស្សអស់ចំនួន ៦នាក់ របួស ១១នាក់ និងបណ្តាលឲ្យងាប់សត្វគោជាច្រើនក្បាល រួមនឹងទ្រព្យសម្បត្តិមួយចំនួនធំទៀត។
មន្ត្រីសាខាបានបញ្ជាក់ថា ខ្យល់កន្រ្តាក់ និងគ្រោះថ្នាក់ដោយរន្ទះកន្លងមកបានកើតមានក្នុងភូមិសាស្ត្រឃុំសង្កាត់ចំនួន ៩៦ ស្មើ ៤១១ភូមិ ទូទាំងក្រុង ស្រុកចំនួន១៤ របស់ខេត្តបាត់ដំបង។
ក្រោយមានករណីគ្រោះធម្មជាតិនេះ មន្ត្រីក្រុមការងារកាកបាទក្រហមសាខាខេត្តបាត់ដំបងបានចុះផ្តល់នូវអំណោយមនុស្សធម៌បឋមយ៉ាងទាន់ពេលវេលាសម្រាប់ជនរងគ្រោះដើម្បីជួយសម្រាលការខ្វះខាតចំពោះមុខផងដែរ៕