កណ្តាល៖ អាជ្ញាធរបានបញ្ជូនស្ត្រីម្នាក់ជាម្តាយដែលបានសម្លាប់កូនបង្កើតខ្លួនឯងដែលទើបតែកើត យកសាកសពទៅបោះចោលក្នុងប្រឡាយទឹក កាលពីថ្ងៃទី២៩ ខែឧសភា ឆ្នាំ២០២៣ ដែលស្ថិតនៅក្នុងស្រុកកណ្តាលស្ទឹង ខេត្តកណ្តាល។

អាជ្ញាធរបានបញ្ជូនជនសង្ស័យជាម្តាយទៅសាលាដំបូងខេត្តកណ្តាលកាលពីថ្ងៃទី០៥ ខែមិថុនា ឆ្នាំ២០២៣។ តាមចម្លើយជនសង្ស័យ កាលពីថ្ងៃទី២៩ ខែឧសភា ជនសង្ស័យបានទៅបត់ជើងរួចក៏បានកើតកូន ហើយជនសង្ស័យក៏បានយកដៃច្របាច់-ក ទារកនោះ រួចហើយក៏យកថង់ប្លាស្ទិកពណ៌ខ្មៅមកខ្ចប់ទារកនោះ បន្ទាប់មកក៏យកទារកនោះទៅទម្លាក់ចោលនៅក្នុងប្រឡាយទឹក។ សាកសពទារកនោះត្រូវបានគេប្រទះឃើញអណ្តែតផ្គាប់មុខនៅក្នុងប្រឡាយទឹកកាលពីថ្ងៃទី០១ ខែមិថុនា ឆ្នាំ២០២៣។

ក្រោយមានករណីនេះ អង្គភាពការពារកុមារ (CPU) បានចុះមកស៊ើបអង្កេតលើករណីនេះ ហើយក៏បានស្រាវជ្រាវ និងឈានដល់ឃាត់ខ្លួនជនសង្ស័យជាម្តាយអាយុ ៣៩ឆ្នាំដើម្បីផ្តន្ទាទោសទៅតាមច្បាប់៕