ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន អញ្ជើញធ្វើជាអធិបតីភាពក្នុងពិធីបើកព្រឹត្តិការណ៍អាស៊ានប៉ារ៉ាហ្គេមលើកទី១២ ឆ្នាំ២០២៣ នាថ្ងៃទី០៣ ខែមិថុនា ឆ្នាំ២០២៣នេះ នៅពហុកីឡដ្ឋានជាតិមរតកតេជោ។

នៅក្នុងពហុកីឡដ្ឋានជាតិមរតកតេជោទាំងមូលមានមនុស្សរាប់ម៉ឺននាក់បានចូលរួមក្នុងពិធីបើកព្រឹត្តិការណ៍ស៊ីហ្គេម ដោយបង្ហាញអារម្មណ៍រំភើប បើទោះបីមានភ្លៀងធ្លាក់បន្តិចក្តី។

នាពិធីបើកព្រឹត្តិការណ៍អាស៊ានប៉ារ៉ាហ្គេមនៅថ្ងៃទី០៣ ខែមិថុនានេះ មានការសម្តែងផ្ទាំងទស្សនីយ៍ភាពដ៏អស្ចារ្យដោយក្រុមសិល្បករ សិល្បការិនីមកពីក្រសួងវប្បធម៌ និងវិចិត្រសិល្បៈ។

គូសបញ្ជាក់ថា ព្រឹត្តិការណ៍ប្រកួតកីឡាអាស៊ានប៉ារ៉ាហ្គេមនឹងធ្វើឡើងចាប់ពីថ្ងៃទី០៣-០៩ ខែមិថុនា ឆ្នាំ២០២៣ ដោយមានប្រតិភូកីឡាក្រៅប្រទេសចំនួន១១ សរុបជាង ២ពាន់នាក់ នឹងចូលរួមប្រកួតលើប្រភេទកីឡាចំនួន១៤ មានដូច វាយសី ប៊ូស្យា អុក យូដូ បាល់ទាត់ជនពិការភ្នែក បាល់ទាត់ចលករខួរក្បាល ហែលទឹក បាល់បោះរទេះ បាល់ទះអង្គុយ វាយកូនឃ្លីលើតុជនពិការ បាល់បោះជនពិការ កីឡាលើកទម្ងន់ជនពិការ កីឡា E-Sport និងកីឡាអត្តពលកម្មជនពិការ៕