ភ្នំពេញ៖ អាជ្ញាកណ្តាលជប៉ុនចំនួន៤០រូប នឹងមកកម្ពុជាសម្រួលការរៀបចំព្រឹត្តិការណ៍កីឡាអាស៊ានប៉ារ៉ាហ្គេមលើកីឡា៤ប្រភេទ គឺកីឡាអត្តពលិកម្ម កីឡាលើកទម្ងន់ កីឡាហែលទឹក និងកីឡាបាល់បោះជិះរទេះ។ អាជ្ញាកណ្តាលជនជាតិជប៉ុនចំនួន៤០រូប គឺសុទ្ធតែជាអ្នកមានបទពិសោធន៍ដែលបានចូលរួមព្រឹត្តិការណ៍កីឡាតូក្យូ២០២០។

តាមសេចក្តីព័ត៌មានពីទីភ្នាក់ងារកីឡាប្រទេសជប៉ុន អាជ្ញាកណ្តាលជប៉ុននឹងបញ្ជូនមកសម្រាប់សម្រួលលើការប្រកួតកីឡា៤ប្រភេទ គឺកីឡាអត្តពលិកម្ម ដែលនឹងប្រកួតចាប់ពីថ្ងៃទី០៤-០៩ ខែមិថុនា កីឡាលើកទម្ងន់ចាប់ពីថ្ងៃទី០៤-០៧ ខែមិថុនា កីឡាហែលទឹកចាប់ពីថ្ងៃទី០៤-០៨ ខែមិថុនា និងកីឡាបាល់បោះជិះរទេះ ពីថ្ងៃទី០៣-០៧ ខែមិថុនា។

ព្រឹត្តិការណ៍កីឡាស៊ីហ្គេមដែលបញ្ចប់ទៅថ្មីៗនេះ អាជ្ញាធរកណ្តាលជប៉ុន៤០រូបក៏ត្រូវបានបញ្ជូនមកកម្ពុជាផងដែរ។

គូសបញ្ជាក់ថា ព្រឹត្តិការណ៍ប្រកួតកីឡាអាស៊ានប៉ារ៉ាហ្គេមនឹងធ្វើឡើងចាប់ពីថ្ងៃទី០៣-០៩ ខែមិថុនា ឆ្នាំ២០២៣ ដោយមានប្រតិភូកីឡាក្រៅប្រទេសចំនួន១១ សរុបជាង២ពាន់នាក់ នឹងចូលរួមប្រកួតលើប្រភេទកីឡាចំនួន១៤ មានដូច វាយសី ប៊ូស្យា អុក យូដូ បាល់ទាត់ជនពិការភ្នែក បាល់ទាត់ចលករខួរក្បាល ហែលទឹក បាល់បោះរទេះ បាល់ទះអង្គុយ វាយកូនឃ្លីលើតុជនពិការ បាល់បោះជនពិការ កីឡាលើកទម្ងន់ជនពិការ កីឡាE-Sport និងកីឡាអត្តពលកម្មជនពិការ៕